AFC game mawi leh Thanga ke vei lam

Zirtawp zan khan Chawnpui FC midfielder Vanlalthanga'n MPL-a goal ropui ber zinga mi a khung - kai thar Chawnpui FC leh Aizawl FC 2-2 in an inhnehtawk.

Mc Dowell's No. 1 Soda Mizoram Premier League Season 7-ah Aizawl FC-in match zawna chak an la nei lo.

MPL kaithar hian David Laltlansanga leh Vanlalthanga te hmangin ṭum hnih hma an hruai a, I League club-in F. Lalremsanga leh Lalkhawpuimawia te hmangin an sut ve ve. I League club defender Hmingthanmawia chuan minute 83-naah yellow card vawi hnihna a hmuh avangin AFC hi player 10-in an khel tluan.

Game mawi

AFC-in kum lama naupang zawk player Remsanga, Isak Vanlalruatfela, Paul Ramfangzauva leh Rochharzela te an ring ngam a, an che vel a hmuhnawm bakah game rang an khel a, Lammual kal a timanhla hle.

Amaherawhchu kum naupanna a lang a, an chet ranna chuan Chawnpui tlarhnung an ṭhiah phah rualin tihsual an ngah ve bawk. Lengpui tlangval Remsanga'n cool takin keeper a pet khum a, inkhel thunun mah se an goal khung hi si phurh sutna a ni.

Minute 48-naah Mapuia hmangin si phurh a sut leh a, Chawnpui ṭantuten offside-ah ngai mah se replay aṭanga thlir nawn chuan Aizawl FC game play mawi zia lanna chauh a ni.

Hun tawp lamah Aizawl FC-in chakna goal an beisei a, amaherawhchu point khat bak an hmu ta lo.

Thanga ke veilam

Chawnpui hi team nêm tur zinga chhiar ni mah se tun MPL-ah vawi khat chiah an la chak lo a, I League club nena an inhnehtawk pawh hi a mak lo.

MPL kaithar hian minute 25-naah an veng tlangval Avida chuan mawi zetin a hlai lut. First half injury time-ah Thanga'n entu mipui tan goal mawi danglam bik a thun - halfway line pelh hret aṭangin Hualngohmun tlangval hian a ke vei lamin a pet kum lut a, MPL-a keeper rintlak bera chhal theih Gurpreet-a'n a dan theih loh avangin goal ropui a nihzia a lang.

MPL season sarih neih tawhah Luangmual FC midfielder pahnih Jonathan Lalsangzuala leh Lalruatdika bakah Chanmari FC forward Malsawmfela ten halfway line bul aṭangin an khung tawh a, heng goal ropui pathum chhiar tel pawh hian Thanga ke vei lam aṭanga chhuak goal hi MPL-a goal mawi bera sawitu an la tam khawp ang.

Thanga hian MPL7-ah goal nga a khung tawh a, Chanmari FC forward Lalnunzama nen goal khung tam ber an ni mek.

Hmabak Serchhip

MPL7 Round 7 chu Serchhip-ah khelh a ni dawn a, Aizawl FC hian Zirtawpni hian Bethlehem Vengthlang an hmachhawn dawn. He mi ni vek hian Chawnpui hian Mizoram Police an hmachhawn dawn.

Round 7 inkhel result hian table-ah nghawng lian tak a nei dawn a, inkhel a hmuhnawm dawn avangin Serchhip mipui an vannei hle.