Bayern an chul; Dortmund an vul

Inrinni zan khan German champion Bayern Munich chu Borussia Monchengladbach lakah 0-3 in an tlawm. Hmahruaitu Borussia Dortmund chuan inkhel hmuhnawm takah substitute Paco Alcacer-a hattrick hmangin Augsburg 4-3 in an hneh thung.

Niko Kovac-a enkawl Bayern hian Bundesliga match sarih an khelh aṭangin point 13 an hmu a, an nomawi kawl lai humhim an duh a nih chuan insiamṭhat an mamawh - Dortmund aiin point liin an hniam zawk der tawh a ni.

Dortmund an huaisen

Signal Iduna Park-ah mi­khual lamin Alfred Finnbo­gason hmangin minute 22-naah goal hmahruai an khung a, chawlhlawk hmain goal dang a lut lo. Second half-ah bench aṭanga rawn lut Paco Alcacer chuan an si phurh a rawn sut.

England senior team tana kohna dawng hlim Jadon Sancho chuan Alcacer goal khung tur hi a siamsak, kum 18 mi Sancho hi England squad puan thar zinga naupang ber a ni - Bundesliga season kal laiah a ṭhiante goal khung tur vawi ruk a siamsak der tawh.

Augsburg zawkin minute 71-ah Philipp Max hmangin hma hruai nawn leh mah se, Spanish striker Alcacer bawkin a sut a, hun tawp nan minute ruk chauh a awm tawh tihin Mario Gotze chuan an hmahruai vawi khatna ni turin a khung ve leh bawk.

Hneh loh nei loa kaltluang lai Dortmund lamin hun tawp dawna hma an hruai let avangin chak zawk tura ngaih an ni. Mahse, inkhel a la zo lo, Gotze goal luh aṭanga minute thum hnuah Michael Gregoritsch chuan an si phurh sut ve lehin 3-3 a ni.

Injury time a ni a, minute li pek belh a zawh hnuah Dortmund-in freekick an hmu a, Alcacer chuan mawi takin a pet goal a, hun a tawp zui.

A zawna season ruk chhung zet Bayern Munich-in league nomawi an chawi hnuah an mahni chuhpui phak an awm dawn niin a lang, Augsburg laka inlan Dortmund player kum chawlhrual kha 23 chiah a ni a, 2011 November hnua an naupan ber ṭum a ni - an kum tam lo mah se khelmual chhungah an huaisen a, an thawhrim rah an seng bawk.

Bayern an chuai?

Bayern Munich manager Kovac-a'n manager hmasate tih dan ang lo takin a player a siksawi nasa thei hle a, Inrin­ni zana Borussia Mon­cheng­ladbach an mikhual ṭum erawhin a neih ṭhat dan berin a remkhawm thung.

Allianz Arena-ah Bayern lamin an ma­mawh goal an khung thei lo, mikhual lamin Alassane Plea, Lars Stindl leh Patrick Herrmann te hmangin an khung thung. German cham­pion hian an league match hmasa paliah hnehna chang vek mah se; tun hnai inelna hrang hranga an match hnuhnung paliah chak ni hmel an hmu ta lo.

Augbsurg nen an inhnehtawk hnuah Hertha Berlin leh, Bo­rus­sia Monchengladbach te an hneh lo a, Croatian ma­na­ger Kovac-a naute hian Cham­pions League lamah Ajax an inhnehtawkpui bawk.

Season tir lam chauh la ni mah se Kovac hi an ban mai ang em tih chu zawhna langsar a ni nghal. Kovac chuan, "Ka hma hun ka sawi duh rih lo, chiang taka ka sawi theih chu football hi a awlsam lo, he hmunah hi chuan duhthusam ang thlapa thil kalpui a ngai a ni," a ti.

Kum 46 mi Kovac chuan, "Hun ṭha vawi tam kan nei a, a pawimawh ber goal a lut thei tlat lo. Tun ṭum kan inkhelah khan tlarhnung lamin tihsual an nei tih chu ka hmu, mahse a hnung lam hi kan buaina ber chu a ni lo," tiin a sawi. Captain Manuel Neuer pawhin an tlarhma buaina chungchang a lo sawi lang tawh.