Hamilton tan nomawi a hnai ta

Lewis Hamilton chuan Formula 1 nomawi a kawl lai chu a humhim thei ngei dawn niin a lang ta. Nimina tlan zawh tak Japanese Grand Prix-ah Mercedes driver hian hnehna a chang a, championship lama a elpui ber Sebastian Vettel erawh parukna a ni phak hram chauh a ni.

Mercedes driver Hamilton-a'n driver championship-ah point 67 zetin hma a hruai fal ta, tun hnaiah a zawnin intlansiak paliah hnehna a chan theih avangin fal taka hma a hruai hi a mak lo.

Britain tlangvalin hnehna a chan rual hian Mercedes car khalhtu pakhat zawk Valtteri Bottas chu pahnihnaah a thleng ve bawk - Mercedes driver ten a zawnin intlansiak pahnihah pakhatna leh pahnihna dinhmun an luah thei. Anni pahnih hnung­ah hian Red Bull duhlai Max Verstappen a thleng ve bawk.

October 21 hian United States Grand Prix an tlan leh dawn a, Austin, Texas-ah hian Mercedes driver pahnih hian a hmasa ber leh a dawt nihna an hauh leh thei a nih chuan Hamilton-a'n a vawi nga nan Formula 1 nomawi a chawi leh ang. Intlansiak hmabak pathum la awm chungin a champion thei dawn tihna a ni.

Kum 33 mi Hamilton chuan, "Season kan hmang rei tulh tulh a, kan team chu kan ṭha zual zel mai si. Season dangah pawh Austin hi kan tan hmun ṭha a ni tawh ṭhin a, intlansiak hlan ka nghakhlel tawh hle," tiin champion theih a inbeisei thu a sawi der tawh.

Suzuka tlankawngah Hamil­ton hian pole position aṭang­a bul ṭanin, hnehna chang tur hian buaina leh harsat­­na liantham a tawk lo. F1 car a khelh chhungin a vawi 80 nan pole a chang a, car in­tlan­siakna sang berah hian ṭum 71 ngawt hnehna a chang tawh. Record nei ṭha ber Mi­chael Schumacher ai­in vawi 20 in a la chak tlem zawk.