Tuchel leh Chelsea-in nomawi an beisei

FIFA Club World Cup-ah champion tura rinkai ber Chelsea-in zanin dar 10:00 hian Mohammed Bin Zayed Stadium, Abu Dhabi-ah Al-Hilal an hmachhawn dawn. Kum 2013 aṭang khan European champion-in Club World Cup nomawi hi an la chawi zel a, tun ṭumah pawh hian Thomas Tuchel-a hoten nomawi an beisei ang.

Mendy a tel
Chelsea-in hliam vangin Ben Chilwell leh Ruben Loftus-Cheek te an la chhawr thei lo. UAE zin tur zingah inhliam vanga hun rei tak chawl tawh Reece James an telh zet a, amaherawhchu English right back aiah keeper Edouard Mendy an dah lut ta zawk.

Blues first keeper Mendy-a'n AFCON 2022-ah an ram Senegal a champion pui zo chiah a, penalty shootout hmangin final-ah champion ngun ber Egypt an hneh. Kum 29 mi Mendy hi best goalkeeper-ah thlan a ni a, January thla khan Best FIFA Goalkeeper a dawn bawk avangin London club-in chhawr ngei an tum.

Mendy hi squad-ah dah mah se Al-Hilal lakah Kepa Arrizabalaga a lut ta zawk a nih pawhin a mak hran lo ang. Khawvel goalkeeper man to ber Kepa hian kartawpa Plymouth Argyle an hneh ṭumin extra time-ah penalty a dang a, an chak phah.

Champion duh Chelsea
Chelsea hian kum 2012 khan Japan-ah FIFA Club World Cup hi an khel tawh a, final-ah Corinthians an hneh lo. Kum 2007 leh 2020 chhunga European club zinga Club World Cup champion thei lo awmchhun a ni.

Kum 10 liam taa Brazilian club an hneh loh ṭum hian Everton coach ni ta Frank Lampard chu captain a ni a, Toffees assistant coach Ashley Cole pawh a la khel. Tuna Chelsea player zinga inlan awmchhun chu César Azpilicueta a ni a, Blues captain ni ta hi bench aṭangin a lut.

Chelsea midfielder Mason Mount chuan, "Club World Cup-ah hian kan la champion ngai lo a, inelna danga kan tel tawhna ang thoin champion ngei kan duh. Champion duhna tak tak thinlung put kan duh a, UAE-ah hun duhawm tak kan hman ngei kan beisei," tiin champion an tum thu a sawi.

Thomas Tuchel-a'n a chhawr theih zinga a player neih ṭhat ber a thawhchhuahpui a, an chak lo a nih pawhin final khelh ni February 12, Inrinniah pathumna zawn tho a ṭul avangin London club hian semifinal-a chak ngei hi an duh dawn a ni.

Asia aiawh Al-Hilal
Asia champion Al-Hilal-in second round-ah inelna thlengtu UAE club Al Jazira 6-1 in an hneh a, Club World Cup-a khingpuite hneh chiang ber record an siam. Saudi Arabia club Al Hilal hi Asia rama club hlawhtling bera chhal theih an ni a, Asian champion vawi li ni tawhin champion ngun ber an ni.

Al-Hilal hian Al Jazira an sawp dan aṭangin team ṭha an ni tih a lang thei a, chutihrualin an squad hrim hrim pawh hi Asian club atan chuan a ṭha ve tawk hle. Team enkawltu Leonardo Jardim hian Saudi club a enkawl hma hian Sporting Lisbon leh Monaco a enkawl.

Al Jazira an hneh ṭuma man of the match-a thlan Matheus Pereira hi season liam ta khan Premeir League club West Brom tan khelin match 33 aṭangin goal 11 a khung thei a, club lian zawk nen pawh sawizawm ni mah se kum 25 mi lek ni chungin Al-Hilal hi a zawm.

Foreigner dang an neih hi Man-chester United pawha khel tawh Odion Ighalo te, Peru midfielder André Carrillo, Colombia midfielder Gustavo Cuéllar, Brazilian striker Michael, Mali midfielder Moussa Marega leh South Korea defender Jang Hyun-soo te an ni. Brazilian forward Michael tih loh zawng hi chu mahni ram tana khel tawh vek an ni hlawm.

Player dang zawng hi Saudi player an ni hlawm a, anni pawh hi dah hniam theih an ni lo. World Cup qualifier-ah Saudi Arabia hi Japan leh Australia te nen an awm ho chungin group hmahruaitu an ni mek a, player tam zawk hi Al-Hilal a khel te an ni.

FIFA Club World Cup - Thlirna Tawi
First Round - February 3, Ningani
Al Jazira 4–1 AS Pirae
ALJ : Zayed Al-Ameri 5'; Ahmed Al-Attas 25'; Milos Kosanović 41'; Abdoulay Diaby 63'
ASP : M'hammed Rabii Rabii 48' (OG)

Second Round
February 5, Inrinni
Al Ahly 1 - 0 Monterrey
ALA : Mohamed Hany 53'
February 5, Pathianni
Al Hilal 6 - 1 Al Jazira
AlH : Odion Ighalo 36'; Matheus Pereira 40'; Mohamed Kanno 57'; Salem Al-Dawsari 77'; Moussa Marega 88'; Andre Carrillo 90+2' (pen.)
AlJ : Abdoulay Diaby 14'

Semifinal
Nizan Inkhel - Result kan hre hman lo
Palmeiras 10:00 PM Al Ahly
Zanin Inkhel Tur
Al Hilal 10:00 PM Chelsea
Third Place : February 12, Inrinni (6:30 PM)
Final : February 12, Inrinni (10:00 PM)