AFCON champion an hmuak ropui

Africa Cup of Nations champion Senegal chuan Thawhṭanni khan an ram khawpui Dakar an thleng a, mipui sing chhuangin an ram pasalṭhate hi an hmuak.

Africa rama football inelna sang ber AFCON-ah hian Senegal hi an la champion ngai lo a, kum 2019 khan final thleng mah se Algeria lakah an tlawm. Kum 2002 pawh khan final an thleng a, Cameroon an hneh lo.

Tun ṭum hi Senegal-in AFCON-a an champion hmasa ber a ni a, final-ah champion ngun ber Egypt an hneh. Liverpool forward Sadio Mane chuan penalty shootout-ah chakna goal a khung a, best player-ah thlan a ni bawk.

Kum 60 mi computer programmer Thierno Niane chuan, "Kan ram inkhel hi kum 1970 aṭang khan ka lo en tawh ṭhin a, hun pawimawhah kan chak lo leh ṭhin. Tun ang hun hi kan nghak rei tawh. Final kha kan chhungkuain kan en a, ka nupui fanaute bulah lawm avangin ka ṭap," tiin nomawi an chawi avanga lawmthu a sawi.