Rohit-a'n bul a ṭan ṭha - Gavaskar

India cricket legend Sunil Gavaskar chuan Rohit Sharma chu ball vara India tana full time captain hna a chelh hmasak berah a chetṭhat thu a sawi. Men in Blue hian wicket rukin mikhual West Indies chu an sawp a, vawiin tlai dar 1:30 hian Narendra Modi Stadium-ah ODI match hnihna an khel leh ang.

India captain hlui Gavaskar chuan, "Full mark 10 ni ta se, Rohit kha 9.99 ka pe ang. Bowler a thlak kual dan te, player a rem danah te khan fak a phu. Engkim mai kha a tidik vek a ni. Duhthusama ṭhain bul a ṭan," tiin Rohit a fak.

T20 Cricket World Cup zawhah Virat Kohli-a'n captain hna a chawlhsan thu a puang a, BCCI-in ball var hmanna ODI leh T20 captain inang an duh avangin Rohit hi inelna chi hnihah an captain tir. January thlaa India leh South Africa inkhelh ṭum khan Rohit hi a inhliam avangin KL Rahul-a'n captain hna hi a chelh thung.