Eriksen-a'n training a ṭan ta

Brentford-in January transfer-ah player langsar Christian Eriksen an lalut a, Danish midfielder hian Thawhṭanni khan training a zawm. Tottenham leh Inter Milan midfielder hlui Eriksen chuan, "Tunah chuan Photosphop a ni tawh lo. A hmunah ka awm tak tak tawh e," tiin twitter-ah a ziak.

Premier League kai thar Bees hian zanin dar 1:15-ah champion lai Manchester City an hmachhawn dawn a, Etihad Stadium-a inkhel turah hian Eriksen a inlan dawn em, tih erawh he thu ziah lai hian a hriat loh.

Eriksen hi nikum June thlaa Finland nen Euro 2020 group match-a an inkhelh ṭumin lungphu chawl vangin khelmualah nikhaw hre loin a tlu a, lung lamah harsatna a nei a, defibrillator a vuah. Serie A danah defibrillator vuah chunga inkhelh theih a nih loh avangin Inter Milan nen inhriatthiam tawnnain contract an titawp.

Danish midfielder Eriksen hian kum tawpa khelh tur FIFA World Cup-ah Denmark tana khelh a duh a, coach hmelhriat sa Thomas Frank awmna Bees a thlang. Danish coach Frank hian, "Bees history-a player lakluh fuh ber a ni thei hial ang," tiin Eriksen-a'n theihna a neihsan thu a sawi.

Erisken hian Bees training hmasa ber hi ṭha takin a zo a, nikum December thla khan a club hlui Ajax-ah training a nei tawh. Brentford media-in an kawmnaah Danish midfielder chuan, "Sabrina (a nupui) bulah khan inkhelh chawlhsan ka duh thu ka hrilh a, chutihrualin engkim a ṭhat chuan ka rilru ka thlak ang, tiin ka hrih. Vanneihthlak takin engkim a ṭha," tiin a sawi.

Brentford hian season khelh hmabak atan an lalut a, Eriksen-a'n a hun neih pawimawhzia a hrehciang. Danish midfielder chuan, "Tun thla 4-5 awm tur hi ka theihna lantirna hun a ni a, football player ka nih lantir ngei ka tum," tiin a sawi.

Eriksen hi Premier League-ah a mikhual lo a, Spurs tan match 226 khelin goal 51 a khung. Assist (62), chance siam sak (571), box pawn aṭanga goal khung (23) leh freekick aṭanga pet goal (8) kawngah Premier League-a awm chhung, kum 2013-2020 inkarah khan a record a ha ber a ni. Danish midfielder hian Spurs-a a theihna ang hi Bees-ah a lantir thei ang em, tih chu hunin a hril dawn a, kum 29 mi chauh la nih avangin a vanglai hmang chho tur chauh a la ni.