Conte hnuaiah Kane a hlim

England captain Harry Kane chuan Tottenham Hotspur manager thar Antonio Conte a fak a, player-te rilru puthmang a thlak nasat thu a sawi. Zanin dar 1:15 hian Spurs-in Premier League match khel turin Southampton an mikhual ang.

Kum 28 mi Kane chuan, "A hnathawh hi a ropui a, coach a nihna bakah a mizia hrim hrim hi ka dah sang hle a ni," tiin manager Conte a fak.

English striker Kane hian nikum nipui bazar khan Manchester City pan a duh a, London club chhuahsan a tum. Hemi a nih avang hian season ṭantirh lamah a che ṭha tawk lo a, sawisel a hlawh hmah.

Amaherawhchu Kane hian inelna hrang hrangah goal 15 a khung leh tawh a, kar liam ta FA Cup-a Brighton an hneh ṭum pawhin goal hnih a khung a, Premier League bikah erawh goal nga chiah a la khung.

Italian manager Conte pawhin Kane hi a fak tawh ṭhin a, English striker ṭhatzia a zawi zel bawk. Euro 2020 lai khan Conte chuan, "Harry Kane hi a khelhpuite ball a pass thiam avangin an fak a, Euro 2020 semifinal-a Denmark laka siphurh an sutna te kha entirna ṭha tak a ni. Mahse Kane a ṭhatna tak chu box chhungah a ni a, goal hmaah a hriam. Amah enkawltu coach chu ni ila, goal hmaah a ṭhat em avangin box chhungah ka awmtir ang," tiin English striker chungchang hi a sawi.

Brighton an hneh zawhah Conte chuan, "Goal hnih a khung hi a pawimawh a, no. 9 a ni a, goal khung hi a hna a ni," tiin a sawi a, Euro 2020 laia a sawi ang ngeiin goal khung turin a chhawr.

Chutihrualin Kane hian ball pass a la thiam reng a, Spurs player thar Dejan Kulusevski pawhin a fak. Sweden international Kulusevski chuan, "A ke pahnihin duh tawkin ball a sem kual thei a, mi bik a ni. Ball a chan tawh chuan ka tlan mai a ngai a, a chhan chu ball min pe thei dawn tih ka hria," tiin a sawi.

Brighton an hmachhawn ṭumah player thar Kulusevski leh Rodrigo Bentancur te bench aṭangin an lut a, Saints lakah pawh minute an neih ngei a rinawm. Conte hote hi season thara Champions League khelh tum an ni a, Saints hi 12-naah awm mah se relegation zone-a awm Watford aia point 10 chauha an hmuh tam avangin season tawp lam harsat loh nan Tottenham Hotspur stadium-ah point hlawhchhuah an mamawh.