Manchester United-in transfer-ah sum an hloh hnem

Swiss rama football zirchianna hmun CIES Football Observatory chuan kum 10 chhunga Europe-a league sang panga club ho transfer hman dan an zirchiang a, Manchester United chuan kum 2012 aṭang khan transfer-ah euro tluklehdingawn 1.075 zet an hloh.

Hetihlai hian French club LOSC Lille chuan euro maktaduai 349 zet an hlep thung. CIES Football Observatory zirchianna hi a ngaihnawm a, club hrang hrang sum hman dan a lang chiang hle.

English club sum hman dan
CIES Football Observatory zirchiannaah hian Europe club lian sum hloh hnem 20 zinga 14 zet hi Premier League club an ni a, top 10-ah English club paruk an awm.

Man United hian euro maktaduai 1545 (€1545m) an hmang a, player lei nana sum hman tamah erawh Manchester City (€1699m), FC Barcelona (€1630m) leh Chelsea (€1614m) ten an hmang tam zawk.

Amaherawhchu, Man United hian player hralhna aṭangin euro maktaduai 460 chauh an hmu let a, an sum hloh zat chu euro maktuduai 1075 a tling pha. Kum 2016-a pound maktaduai 89.5 senga an lakluh Paul Pogba hi nipui bazarah a thlawnin an chhuak thei a, Anthony Martial (£36m) leh Donny van de Beek (£40m) te aṭangin pawhin an chan hnem. Man United hian transfer-ah player lak fuh loh an ngah tihna a ni.

Chutihrualin Man City pawhin euro maktaduai 984 zet an hloh pha bawk. Premier League champion rinkai Liverpool-in euro maktaduai 1128 hmang pha mah se player hralhna aṭangin euro maktaduai 781 an hmuh tho avangin euro maktaduai 347 chauh an hloh.

Reds hi champion rinkai zingah an hloh tlem lawrlak a, chu chauh ni loin West Ham United, Arsenal FC, Everton FC leh Aston Villa te ai pawhin an hloh tlem zawk. Relegation zone-a awm Newcastle aia Liverpool sum hloh tamna hi euro maktaduai riat chauh a ni bawk.

Premier League club zingah player hralhna aṭanga hlawk awmchhun chu Brentford chiah an ni a, player hralhna aṭangin euro maktaduai 43 an hlep thei a ni.

Big club = Sum hman tam
Europe league hrang hrangah sum hmang tam apiang an che ṭha zel a tih theih. Spain-ah FC Barcelona, Real Madrid leh Atletico Madrid te chu sum hmang tam pathum an ni. Tun season-ah Los Blancos kal fawr deuh mah se season 10 chhunga league nomawi chawi thei chu an pathum chiah hi an ni.

La Liga-a pahnihnaa awm mek Sevilla hian euro maktaduai 12 hlep nei pha mah se euro maktaduai 685 an hmang chhuak tho a, chutihrualin player hralhna aṭangin euro maktaduai 697 zet an hmu thung.

Serie A-ah tun hnai kum 10 chhungin Juventus vawi kua an champion a, sum an hmang hnem ber bawk. Juve hian euro maktaduai 1542 zet an hmang a, player hralhna aṭanga euro maktaduai 981 an lak phak chungin euro maktaduai 561 an chan pha tho. Season liam taa champion Inter Milan-in sum an hmang tam leh bawk a, euro maktaduai 1058 zet an hmang pha.

Bundesliga-ah pawh tun hnai kum 10 chhungin Bayern Munich leh Borussia Dortmund chiah an champion thei a, heng club pahnih hi sum hmang tam an ni. Bayern hian euro maktaduai 815 an hmang a, player hralh aṭangin euro maktaduai 452 hmangin euro maktaduai 363 an hloh.

Bayern hi vawi kua an champion laiin Dortmund erawh vawi khat chiah an champion a, an sum hman danah a chhan a hriat theih. Dortmund hian player lei nan euro maktaduai 806 hmang mah se player hralhna ṭangin euro maktaduai 892 an lalut thung a, euro maktaduai 86 zet a hlep. Bavarians elpui ber Dortmund hian nomawi aiin hlawkna ngai pawimawhin an player ṭha an hralhah a ngaih theih.

Ligue 1-ah PSG-in sum an hmang tam fal lawrlak a, euro maktaduai 1445 zet an hmang a, anmahni hnaih bertu Marseille-in euro maktaduai 413 an hmang. PSG-in uchuak taka sum an hman tam chhan hi Ligue 1 an thunun vang ngawr ngawr ni loin European champion nih an duh vang a ni a, an sum hman dan thlir hian kum 10 chhunga manager panga Carlo Ancelotti, Laurent Blanc, Unai Emery, Thomas Tuchel leh Mauricio Pochettino te an nei hman hi a mak lo.