Villa khelmualah 'him lo' Leeds United

Steven Gerrard enkawlna hnuaia an khelh hnuah Aston Villa-in ngaihven an hlawh a, zanin dar 1:30-ah tun season-a beisei phak lo Leeds United an mikhual dawn.

Villa hi table-ah 11-na an ni mek a, European football beisei chu an tan thil sang hret niin lang tawh mah se Gerrard-a'n a sang thei ang bera season khar a duh ang tih a chiang a, zanin inkhel en ti châkawm zualtu a ni.

Season hmasa lama team hmuhnawm tak Leeds-in an khelh dan thlak lo mah se tun season-ah goal 40 ngawt an chhuah tawh avangin an dinhmun a him lo hle a, zaninah chak ngei an mamawh bawk.

Norwich City-in zanin dar 1:15-ah Crystal Palace an mikhual dawn a, Norwich hi relegation zone pawn lamah awm mah se an tlak theihna 'chance' a la sang hle.

Gerrard-a team
Villa-in coach Dean Smith an ban hnuah November 11 khan coach atan Gerrard an lalut a, Rangers boss hlui hian league match 10 a kaihruai tawh a, vawi nga hnehna chanpuiin vawi li an tlawm a, vawi khat draw an nei.

Gerrard-a hnuaia an ngam loh zingah Manchester City, Liverpool leh Chelsea an tel avangin a hriatthiam theih a, Brentford laka an tlawm erawh inenfiahna tur a ni.

Mahse, Brentford laka an tlawm hnu hian Manchester United an draw a, Everton chu khualmualah an hneh bawk. Tun season-a match thum chhung a zawna point hlawhchhuah la nei lo Villa tan tun hi record duhawm siamna hun ṭha a ni.

He team hian United laka goal khung tawhtu Philippe Coutinho an nei tawh tih hriat a ṭha a, international break-ah Brazil tan goal a khung bawk avangin Leeds tan ven bik tur a ni.

Leeds dinhmun
Season hmasa lawkah hmuh-nawm zetin an khel a, table-a pakuana ni chungin season an khar hial. Tun season-ah erawh Leeds-in goal chhuah an uar a, a khung lam an uar hleihtheih loh avangin an talbuai mek!

Marcelo Bielsa naute hian December-a league match li an khelh aṭangin point khat chiah an hlawh chhuak a, kum 2022-ah an insiamṭhaa ngaih niin, Burnley leh West Ham chu a zawnin an hneh.

Mahse, a zawna an chak hnu lawkah relegation zone-a awm Newcastle United chu 1-0 in an ngam lo a, zaninah an striker chhuanvawr, inhliam mek Patrick Bamford tel loin engtinnge Villa an hmachhawn dawn tih chu thil hriat châkawm a ni.

Leeds hi table-ah 15-na ni mah se an dinhmun a him lo tih hriat tel a ṭha - relegation zone-a awm Watford aia an sanna hi he thu buatsaih lai hian point sarih chauh a ni a, zaninah an tlawm a nih ngat chuan hlauhthawnnain a tlakbuak zui ang.

Norwich beiseina
Season laihawl a thleng chho a, Premier League champion tum leh Champions League khelh tum boruak tluk zetin relegation battle chanchin pawh a ngaihnawm chho leh ta a, zanina Norwich-in Palace an mikhual tur pawh a hmuhnawm loh ring suh.

Norwich hian beisei anga season an ṭan loh hnuah Daniel Farke banin, Villa duh loh Smith an lalut a, a match hmasa berah Southampton hneh nghal mah se a hnu match riatah chak an nei lo - vawi ruk an tlawm a, vawi hnih an draw.

Mahse, kum tharin Norwich tan vanneihna a herchhuahpui a, an league match hnuhnung pahnihah an chak ve ve a, relegation zone aṭangin an tal chhuak - 18-na Watford leh 19-na Newcastle aia an sanna erawh point khat lek a ni a, match khatin an khel tam bawk!

Norwich dinhmun a la ṭha lo takzet a, chak an mamawh - an hmachhawn tur Palace hi an league match hnuhnung pangaah vawi khat chiah an chak a, an chak awmchhun erawh Selhurst Park-a 3-0 a Norwich an hneh a nih avangin Smith-a naute hi an zuam ang.