Odisha-in semifinal an la beisei zel
Mizo player tamna Odisha FC-in season tawpa Indian Super League semifinal khelh an beiseina chu an la chhem nung ve zel a, Thawhṭanni zan khan East Bengal chu 2-1 in an hneh.
Odisha tana Jonathas Cristian de Jesus leh Javi Hernandez ten goal khat ve ve an khung a, Kolkata club tana an thiampuipa Antonio Perosevic goal khungin awmzia a nei phak lo.
Team 11 inelna ISL-ah East Bengal chu 10-na an nih chhunzawm a, Odisha erawh table-ah parukna an ni a, point khat chauhin palina Jamshedpur an thlau - nizan inkhel result a zirin an dinhmun erawh danglam leh thei a ni.
Inkhel chu
Minute 23-na lekah Real Madrid academy chhuak, Odisha attacking midfielder Javi Hernandez chuan 'Spanish magic' min hmuhtir a, East Bengal defender pahnih ven kara a tal put hnuah Jonathas tan a siamsak a, Real Sociedad striker hlui Jonathas tan goal-a chantir a harsa tawh lo.
Chawlhlawk hman a nih hnuah East Bengal-in hma an sawn a, Odisha aiin Kolkata club an hlauhawm zawk - Antonio Perosevic chu Odisha tlarhnung tan hnawksak a tling a, minute 64-naah Franjo Prce hnen aṭanga a ball hmuh ṭha zet chu goal-ah a chantir.
Mahse, East Bengal hlim chhung a rei lo. Odisha goal hmahruai khungtu Jonathas chuan mawi zeta defender pathum a bum hnuah Javi tan a siamsak a, kum 32 mi Javi hian a ṭhianpa duhsakna chu lawm takin goal-ah a khung a, 2-1 in an chak.
Beiseina thamral
January 1-a coach thar Mario Rivera an neih hnuah East Bengal-in hmasawnna nei mah se coach thar hnuaia an match hmasa bera 2-1 a FC Goa an hneh bak an chak leh tawh lo a, an match hnuhnung paliah vawi thum an tlawm - vawi khat inhnehtawk an nei.
Odisha lakah pawh bul ṭan ṭha lo mah se second half-ah an khel ṭha viau a, mahse, a pawimawh ber goal khung turin tlarhmaah an hriam tawk lo - East Bengal hian match 16 an khelh aṭangin point 10 chiah an nei a, an hmabak match liah chak vek pawh ni se semifinal an khel dawn lo tih a chiang tawh.
Kolkata club tan hian Chennaiyin laka draw-na goal khungtu Lalrinliana Hnamte chu minute 83-naah luhtir a ni a, Dungtlang khaw chhuak, Chanmari siam len rawlthar hian a team chhanhim turin minute a khel tam tawk lo.
Mizo tamna
Odisha tan Mizo defender Lalruatthara, midfielder Paul Ramfangzauva, Isaac Vanmalsawma leh Jerry Mawihmingthanga ten inkhel bul an ṭan a, Chanmari tlangval Jerry hi a vanneih zan ni se goal khung thei dinhmunah a ding.
Mizo player pali zingah pathumin Odisha tan minute 90 an khel tluan vek a, Kolasib tlangval Paul erawh minute 63-naah lakchhuah a ni thung - Redeem Tlang chuan a thlak.
Odisha hi second half-ah hnu fual deuh mah se vanneih zan ni se goal hnih aia tam khung thei an ni a, East Bengal defender rual Javi-a'n a bum hnua mawi taka a khung tur chu Hira Mondal chuan goalline aṭangin a lo pet chhuak hman.