Suns tan Devin Booker a inlar

NBA regular season kal laia team hmuhnawm Phoenix Suns chuan Chicago Bulls 127-124 in an hneh, inkhel inhnehtawk taka an chak theihna chhan hi point 38 neitu Devin Booker vang a ni.

Booker hian tun hnaia a match hnuhnung pangaah point 30 a nei tling ziah. Ani bakah hian Phoenix tan hian Chris Paul (19 points, 11 assists) leh Jae Crowder (10 points, 10 rebounds) te an che ṭha bawk.

Bulls hian a zawnin Suns hi vawi li an ngam lo ta, season hmasa an intawn hnuhnung pahnihah an chak lo, season kal laiah ṭum hnih inkhel leh tawhin an la chak lo vek - an tan Western Conference hmahruaitu an sang mah mah.

Inkhel dangah Golden State Warriors a zawna vawi kua an chakna ni turin Oklahoma City Thunder 110-98 in an hneh, point 21 neitu Klay Thompson chu player langsar a ni; Stephen Curry pawhin point 18 & 10 assist leh rebound vawi kua a la, triple double a neih lohna chu rebound pakhat chiah a ni.

Warriors hian 2019 January thla khan match 11 chhung a zawnin hnehna an chang, hemi hnu lamah tun ṭum hi an chak zawn rei ber lai a ni; an record hmasa nih rual turin match hnih chak an la hmabak.

NBA - Nimin Results
Toronto Raptors 116 - 101 Charlotte Hornets
New York Knicks 104 - 113 Utah Jazz
Miami Heat 121 - 100 Washington Wizards
Phoenix Suns 127 - 124 Chicago Bulls
Golden State Warriors 110 - 98 Oklahoma City Thunder