Zaninah Copa del Rey semifinal

Spanish football-a inelna ngaihhlut hlawh ber pawl Copa del Rey semifinal chu zanin dar 1:30-ah khelh ṭan a ni dawn ta a, Spanish Big Three - Atletico Madrid, Barcelona leh Real Madrid zingah semifinal thleng phak an awm lo!

Zanina semifinal first leg inkhel turah Rayo Vallecano chuan Real Betis an mikhual dawn a, an inngam tawk khawpin a rinawm - team pahnih hian first round aṭangin inelna an hmachhawn a, semifinal lut turin team panga ve ve an hneh.

Season hmasa lawka Spanish second division club Rayo hian semifinal kalkawngah Guijuelo, Bergantinos, Mirandes, Girona leh Real Mallorca an hneh a, an hneh zingah team lian tia sawi tur an awm lo.

Hriat tel atana ṭha chu Rayo leh Betis hi January 2020 khan Copa del Rey round of 32-ah an lo intawng tawh a, 2-2 a an inhnehtawk hnuin Rayo hian penalty-ah 4-2 in an pet chhuak - Betis tan tun hi phuba lakna hun ṭha a ni.

Manuel Pellegrini enkawlna hnuaiah Real Betis-in season duhawm tak an hmang mek - La Liga table-ah pathumna an ni mek a, Europa League lamah knockout round playoff an lut a, Copa del Rey semifinal an khel dawn bawk.

Spanish Cup semifinal lut tur hian CFI Alicante, Talavera, Real Valladolid, Sevilla leh Real Sociedad te an hneh a, match nga chhung lek hian goal 16 an khung a, an lamah goal thum chiah a lut!

Kum 2019 hnua a vawi khat nana semifinal khel leh tur chauh ni mah se Copa del Rey-ah vawi hnih an champion tawh a, an hmachhawn tur Rayo erawh 1981-82 hnua an semifinal khel lehna hmasa ber tur niin an la champion ngai lo thung.

Chutihrual chuan Rayo hian Radamel Falcao an kawl tih hriat a ṭha a, Colombian striker ṭha hian tun season inelna hrang hrangah match 19 khelin goal nga a khung tawh a, inkhel boruak sangah chuan a la hlauhawm reng ang.

Squad pumpui en chuan Real Betis hi chak tura rinkai zawk an ni - Spanish forward Juanmi hian tun season-a match 27 a khelh aṭangin goal 16 a khung a, assist vawi hnih a nei bawk.

Striker Borja Iglesias hian match 30-ah goal 12 khungin assist vawi hnih a nei tawh a, match 28-a goal sarih leh assist pasarih neitu Nabil Fekir pawh theihnghilh loh a ṭha.

Copa del Rey Semifinal
First Leg
February 9, Nilaini Zan
Rayo Vallecano 1:30 AM Real Betis

February 10, Ningani Zan
Athletic Bilbao 2:00 AM Valencia

Second Leg
March 2, Nilaini Zan
Valencia 1:30 AM Athletic Bilbao

March 3, Ningani Zan
Real Betis 1:30 AM Rayo Vallecano
*Away goal rule hman a ni lo