Premier League a ngaihnawm zel ; City, Chelsea, Liverpool = 20 points

Pathianni zan Premier League inkhelah Chelsea-in awlsam taka hnehna an chan laiin Liverpool leh Manchester City erawh goal khung loin an inhnehtawk a, point 20 ṭheuh an nei ta.

Premier League match riat khelh tawhah team pathum hi la tlawm miah lo awmchhun an ni a, goal difference avang chauhin City chu table chung ber luahlumtu an ni.

Arsenal leh Tottenham pawhin club pathum hi point hnih chiahin an thlau a, Premier League a ngaihnawm dawn chauh niin a lang.

Pathianni zana Liverpool leh Manchester City inkhelah goal a lut lo a, City-in point thum hawnna remchang nei mah se Riyad Mahrez chuan hun tawp hnaih lamah penalty a chhuih lut thei lo.

Southampton khelmuala chak turin Chelsea tan harsatna a awm lo. Eden Hazard chuan a chet ṭhat chhunzawm zelin goal hmahruai a khung a, Ross Barkley leh Alvaro Morata ten goal khat ve ve khung bawkin 3-0 in an chak.

Goal luh lohna!
Premier League-a attacking football hmuhnawm pho chhuak ṭhin chu Liverpool leh Manchester City an ni. Season hmasa khan team pahnih hi vawi li an intawng a, goal 18 ngawt a lut!

Team pahnih intawn tawhna thlirin goal a luh tam ringtu an tam a, mahse beisei ang erawh a ni lo. Pep-a'n season hmasaa a tawlhthluknaah tawlh thluk nawn a tum lo.

Season hmasa khan Etihad Stadium-ah 5-0 in sawp mah se Sadio Mane hnawhchhuah a nih vangah a puh theih a, Anfield-ah 4-3 in an tlawm a, Champions League quarterfinal match hnihah an tlawm ve ve bawk.

Pep-a'n Klopp-a game nawr na tak gegenpressing nawr let tum atthlak zia a hrechiang tawh. Spanish manager hian, "Anfield-ah chuan open taka khelh chi a ni lo a, chutianga in ti a nih chuan 1% chance pawh in nei lo ang," a ti.

Anfield-ah Pep-a nauten nawr pup pup aiin tawlh hnung deuh an thlang a, muang changa ball in pass kualin hun remchang an neiha Liverpool nawr thut chu an ruahmanna a ni. Goal an hlawh chhuak lo a ni mai thei a, Liverpool goal nawr na tak dan an tumna erawh a hlawhtling.

Pep-a lawm
City-in goal an khung thei lo a, penalty hmanga chakna remchang an neihah an khung lo bawk. Mahse, inkhel thlirkirin Pep erawh a lawm tho a, a naute khelh dan a fak.

Manchester City manager chuan, "Anfield-ah hian kum 40 nge 50 zawk kan chak zo lo tawh a, a tam zawkah kan tlawm bawk. Chumi ngaihtuah phei chuan tun hi result ṭha tak a ni a, ka naute khelh dan avangin ka lawm a ni.

"Liverpool-te ang team hi chuan tihsual kan neih zauh pawhin min hrem mai ṭhin a, tlarhnungah kan khel ṭha em em a ni. Anfield-a hnehna chan chu kan duh ngei a, mahse nikuma kan tlawmna hmunah point kan hlawh chhuak a, nakkumah chuan kan chak tawh mai thei asin," tiin a eng zawngin a thlir.

City hian first half-ah penalty vawi hnih an hlawh chhuak niin an hria a, mahse Dejan Lovren-a'n Sergio Aguero a tih tluk leh Virgil Van Dijk handball chu referee Martin Atkinson-a'n penalty pekna turah a ngai lo.

Mikhual team tan Mahrez-a'n penalty a hlah a ni mai lo a, hun ṭha tak a neihah a pet out bawk - Pathianni zana penalty a pet hma khan Premier League-a a penalty hnuhnung pariatah vawi nga a pet goal lo a, City-in thutlukna an siam fuh tawk lo.

Beisei phak lo
Liverpool tlarhmaa Mohamed Salah, Sadio Mane leh Roberto Firmino inkawp chu Reds hlauhawm chhana sawi ber ṭhin an ni. Mahse, Reds-in tun hnaiah game hautak an ngah a, Klopp-a'n a squad a siksawi khat bawk si avangin a player-te an chau tih a chiang.

Reds-in inkhel ṭantir lam minute 10 chu an thunun tih ngam a ni a, a hnuah erawh beisei an phak lo chhunzawm. Second half-ah an insiamṭha hret a, chance hlauhawm nei tam zawk erawh City an la ni tho.

A thawhrim ngaiin Salah a la thawkrim reng a, season hmasaa goal 44 khungtu hian inrintawkna erawh a la nei lo - chance ṭha vawi hnih a neihah holam takin a chhuah.

Mane leh Firmino ten eng ruai an ang bik lo a, bench aṭanga luhtir Daniel Sturridge-a'n goal a keng tel bik lo. Mahse, an tum hi City an ni miau a, penalty an chhuah loh bawk avangin Klopp a lawm.

Liverpool boss chuan, "Manchester City hmachhawn hi chu engtiklai pawhin a hautak a, he thu hi chu ka sawi nawn fo ṭhin. Team ṭha tak kan tum a, ka naute khelh danah ka lawm hle a ni," a ti a, hliam vanga lakchhuah James Milner dinhmun a ngaihtuahawm loh thu a sawi bawk.