Badminton Initiative Mizoram an hawng

Mizoram badminton hmel hmang thlak danglam hlawk thei tur Badminton Initiative Mizoram chu nimin khan India badminton chief coach Pullela Gopichand chuan Aijal Club-ah a hawng a, Tata Trusts senior consultant Burzis Taraporevala chuan Badminton Initiative sawifiahna a nei.

Mizoram chhunga badminton tana ruahmanna tharah hian Tata Trusts, North East Initiative Development Agency (NEIDA), Pullela Gopichand Badminton Foundation, Mizoram Badminton Association leh Mizoram State Sports Council te chu an thawkho a, niminah hian thawhhona thuthlung an ziak nghal.

Badminton tana ruahmanna thar hi hlawm thum - Badminton Grassroots (GRC), Regional Development Centre ((RDC) leh High Altitude Training Centre (HATC) ah team ṭhendarh a ni a.

GRC-ah hian infrastructure hman ṭangkai a, mi tam thei ang ber hnena badminton zirtir chu an tum hmasak a ni. Tunah hian grassroots centre 40-ah naupang 800 bawr velin an inzir mek.

RDC-ah hian grassroots a ṭha zual chu uluk lehzuala zirtir an ni ang a, heta ṭanga ṭha bik hi HATC atan thlan an ni ang.

High Altitude Training Centre dinna tur hmun hi Sihphir khawtlangin an pe a, hei hi India aiawha tel turte training theihna tur khawpa ṭhaa duan tura hmalakna kalpui a ni.

Sihphir Village Council president HVL Zarzoliana chuan, "Tun laiah ram a uiawm tawh em em a, chutihrualin Mizoram badminton hmasawnna tur a nih chuan kan ui lo a, Sihphir khawtlangin lawm takin ram hi kan pe a ni," tiin a sawi

MBA secretary H. Lalnunsiama chuan, "Kan beisei phak bak a ni a, Mizoram badminton tan chuan hmasawnna duhawm tak a ni. Tuna kan hmachhawp hi tluang taka kalpui a nih theih chuan state dang pawh kan el phak ang," tiin Vanglaini a hrilh.