Wozniacki a thiam ber

China Open aṭangin player langsar tak tak tla mah se, a tawpah erawh world number 2 Caroline Wozniacki a dingchang ta tho. Pathiannia final-ah Wozniacki hian Anastasija Sevastova chu a hneh a ni.

Australian Open cham­pion hian hnehna chang turin darkar khat leh minute 27 a hmang a, harsa lutuk loin 6-3, 6-3 in a hneh. June thla a title a lak Eastbourne nomawi hnua a champion lehna hmasa ber a ni nghal bawk.

2010 China Open cham­pion Wozniacki chuan, "China hi chuan ka nunah thil pawimawh tak a chang reng tawh, kum riat liam ta khan he hmun­ah hian a vawi khat nan world number 1 nihna ka hauh tawh a ni," a ti. Kum 28 mi Wozniacki hian tennis a khelh hun chhungin no­mawi 30 a chawi tling tawh.

Latvian nula Sevas­tova hi chak lo mah se final a thlen avangin ranking lamah hma a sawn dawn, tournament ṭan hmaa world number 20 ni kha tun kara WTA ranking chhuak tharah chuan 12-na dinhmun a luah phak tawh dawn a ni.

Grand Slam tourna­ment pali an khel zo tawh a, player ten an ranking siamṭhat tum nan hun an hmang mek. US Open champion Naomi Osaka chu tunkar chhunga khelh tur Hong Kong Open-ah inlan tur ni mah se hnungzâng na vangin a inlan thei dawn ta lo.