Goal li khung thei Mbappe

Kylian Mbappe chuan khawvela rawlthar duhawm ber a nihzia lantir chhunzawm lehin an elpui Lyon lakah goal li a khung a, a club Paris St-Germain chu 5-0 a hnehna chanpuiin Ligue 1 hmahruaitu an nihna an sawhnghet.

Paris-a inkhelah Mbappe-a'n minute kuana lekah penalty a hlawh chhuak a, footballer manto ber Neymar-a'n a khung. Chawlhlawk hma­in PSG defender Presnel Kim­pembe leh Lyon midfielder Lucas Tousart te chu hnawhchhuah an ni.

Second half-ah player kim lo ve vein an khel a, Lyon tan France rawlthar duhawm dan theih a ni lo. Minute 61', 66', 69' leh 74'-ah te khungin, minute 14 chhung lekin goal li a ngah hman der! Tun season chhungin match kua a khelh aṭanga goal 11-na a ni nghal bawk.

Thomas Tuchel-a naute hian league match kua an khelh tawhah hnehna an chang vek a, Olympique Lillois-in 1936-37 season daih tawha record an siam, season tir lama match riat chak zawn chu an khum - tun hnai season ruk chhunga vawi nga champion thei PSG hi champion tura rinkai an ni leh der tawh.

Kum 19 mi Mbappe chuan, "Goal tam zawk khung thei tur ka ni, kan khelhpui ten hun ṭha an siamchhuak hnem a nih miau chuan ka tan vanneihna a ni, ka khelhpui ten duhsak takin ball min pe a ni," tiin a theihna sang hle mah se a ṭhiante vanga che ṭha a nihna a sawi hmaih lo.

Pathianni zan inkhel dangah PSG leh Newcastle midfielder hlui Hatem Ben Arfa chuan Rennes tan chakna goal khungin Monaco 2-1 in an hneh. Monaco lam tan captain Radamel Falcao-a'n goal khung mah se, 2016-17 champion hian kum bul an ṭan fuh thei lo - league match vawi khatah bak hnehna an la chang lo a, table-ah 18-na dinhmun an luah mek.