Serchhip mipuiin inkhel ṭha an chang
Serchhip mipuiin inkhel hmuhnawm an en thei dawn e.
Mc Dowell's No. 1 Soda Mizoram Premier League Season 7-ah Serchhip-in round 7 an chang a, tun kar tawp hian inkhel pali a awm dawn. Season ṭan tirhah eng round nge ṭha ber hriat lâwk a har a, Serchhipa khelh tur match pali hi chu a hmuhnawm ngei dawn e.
Transfer nghawng
MFA-in season ṭan hmain MFA Super Cup leh I Day Football an khel ṭhin a, he ti chung hian transfer hun hmasa lamah MPL club-ten an mamawh ang player an la kim hman ṭhin lo.
October thlaah transfer vawi hnihna hawn a ni a, hei hi club tam takin insiamrem nan an hmang ṭhin. Tun ṭumah phei chuan ṭum dang zawng aiin transfer a lian zawk ang hialin a sawi theih.
Aizawl FC-in Liberian striker Ansumana Kromah leh Kyrgyzstani midfielder Bektur Talgat Uulu an lalut a, foreigner pahnih hian club training an zawm tawh. I League club hian Lungleia MPL khelh a nih khan Romanian forward Andrei Ionescu chu Ṭhuamluaia Mualah an pho chhuak tawh a, tun ṭumah pawh hian foreigner pahnih hi Lammuala an inkhelh hmain Serchhip-ah an inlan ngei dawn niin a lang.
Ramhlun North-in I League club ang thoin foreigner pathum an ziak lut a, midfielder John Ampong bakah forward pahnih Bamba Musah leh Waheed Adekunle te an nei a. Heng player pathum te hi Lammualah an inlan vek tawh a, an theihna tak an pholang lo. Mizoram chhungah an tlangnel chho zel a, Serchhip-ah an ṭhatna tak an pholang thei tawh ang.
MPL club dang pawhin squad thuam chak nan Mizo player an la hlawm a, season ṭantirh ai chuan tunah hian an ṭha tawh zawk.
Beiseina nung thar
Round 6 inkhel result-in tun kar tawp inkhel tur hi a tingaihnawm niin a lang thei bawk.
Bethlehem Vengthlang chuan Ramhlun North an chai tawk a, inkhel thlir phei chuan chak phu zawk ni hial mah se 2-2 in an inhnehtawk. BVT hian an player thar midfielder Vanlalchhuanpuia leh forward Lalmuanzova te an
ṭhatpui tih a lang a, an phur lai takin thi leh thau pawlhin Aizawl FC an hmachhawn dawn tihna a ni a, inkhel a hmuhnawm ang.
Mizoram Police-in hrem an tawh vangin training nei lai player an lachhuak thei a, Chanmari FC lakah point hlawh chhuak lo mah se khelmualah erawh an ṭhat phah tih a lang. Inelna hmun Serchhip hi Police training-na hmun Thenzawl nen a inhnaih avangin Chawnpui nen an inkhelh hunah player ṭha dang Malsawmfela te an inlan a beiseiawm a, an ṭha lehzual dawn. Amaherawhchu tuna an dinhmun thlir chuan Chawnpui hi Police aiin point khatin an sang zawk.
Electric Vengin round 6-a Chhinga Veng an hneh tak loh avangin an dinhmun ṭha tak chu a pheh phah a, semifinal khelh an duh a nih chuan Ramhlun North laka point hloh a thiang lo. Chutihrualin Lammualah khelh a nih dawn loh avangin MPL club thar hian anmahni ṭantute Serchhip-ah an chhawm vek thei dawn lo a, an player 12-na tel loin eng nge an nih chiah tih fiahin an awm dawn.
Thlirna dangah chuan an point dinhmun en lo a, an player neih dan aṭanga thlir chuan Ramhlun North hi team ṭha zawk tiin a la sawi theih fan.
A tawp kharna
Chhinga Veng leh Chanmari FC-in round 7 an khar dawn a, a hmawr bawkna a fuh chuan Serchhip-a inelna neih tur hi a hlawhtling nghal ang.
MPL vawi hnih champion tawh Chanmari hian H. Vanlalthanga hoin Serchhip-ah hian MFA Cup nomawi an chawi a, hei hi nomawi lian tham an lakna hmasa ber niin an ropuina inṭanna a ni.
Chanmari hi tunah an tlahniam tiin sawi theih mah se round 6 zawhah hian I League club Aizawl FC chungah an awm tih theihnghilh loh a ṭha a, Chhinga Veng chak loh nei loa kaltluang titawp thei turin an ṭha tawk. Chutihrualin Lalsangzuala Hmar hote hian Serchhip hi an ropuina belhchhah nan an hmang thei bawk.
ROUND 7 - SERCHHIP
October 12, Zirtawpni
Bethlehem VT 11:30 AM Aizawl FC
Mizoram Police 02:15 PM Chawnpui
October 13, Inrinni
Ramhlun North 11:30 AM Electric Veng
Chanmari FC 02:15 PM Chhinga Veng