Laipui a puak ring

9th October, 2018

Arsenal ṭantute chuan khualmuala Fulham 5-1 ngawta an sawp zawhah 'Arsenal kha kan nei let ta' tiin an au rual. Pathianni inkhelah Gunners tan Alexandre Lacazette leh Pierre-Emerick Aubameyang ten goal hnih ve ve an khung a, Aaron Ramsey-a'n goal khat belh ve bawkin Fulham goal awmchhun hi Andre Schurrle khung a ni.

Unai Emery nauten inelna hrang hrangah a zawnin match kua ngawt mai hnehna an chang ta a, 2015 April thla hnua an kaltluan rei ber ṭum niin; Gunners manager zingah Herbert Chapman, George Graham leh Arsene Wenger te hnung zuiin Emery chu hetiang dinhmun luah thei a ni.

Laipui a puak

Europa League khela zin chau Arsenal-in hnungzâng na hliam vangin Mesut Ozil an chhawr thei lo a, damkawr Pierre-Emerick Aubameyang leh Aaron Ramsey te chu bench-ah dah an ni thung - keeper Petr Cech a la inlan thei lo bawk.

Spanish manager hnuaia vul mek striker Lacazette chuan goal hnih a khung a, substitute Aubameyang-a'n goal hnih a khung bakah Ramsey khung tur a siamsak. Second half-a an khelh danah Gunners tlarhma lam chu sawiselna tur an awm lo.

Midfielder Granit Xhaka leh Lucas Torreira te inkawp fuh chuan tlarhnunga awm Shkodran Mustafi leh Rob Holding te tha a ti chak a, chutih rualin Chelsea midfielder hlui Andre Schurrle an ven hman loh vangin Gunners keeper Bernd Leno-a'n clean sheet a nei zui thei lo thung.

Thawhhona

Arsenal manager Unai Emery-a'n Manchester City leh Chelsea ngam lo nghal mah se, a naute a remkhawm fuh hnuah erawh an chak zel - team ṭha lakah fiahna an la hmachhawn leh dawn a, tun dinhmunah rih chuan inrintawkna an nei sang.

Spanish manager Emery chaun, "Minute 90 chhung ṭha takin kan thawkho a, hmun ruak hnawh khah kan tih theih bakah player tinin an ṭhiante an zawng hmu hma thei hle bawk," a ti. Emery hian tihtak zeta an bei chhunzawm a nih chuan Premier League-ah a sang pali zinga an tel phak a beisei thu a sawi bawk.

International break an nei chhunzawm dawn a, October 22 hian Emirates Stadium-ah Leicester City an mikhual ang; Fulham hian October 20 zan hian Cardiff an tlawh thung dawn a ni.