India tan Siami a thiam tawk

Lalremsiami Hmar telna India hmeichhe hockey team chuan Pathianni zana khan 2018 Youth Olympic Games-a an match hmasa ber an khel a, Mizo tleirawl Siami goal hnih hmangin Austria chu 4-2 in an hneh.

India tan hian Lalremsiami (4', 17'), bakah Salima Tete (5') leh Mumtaz Khan (16') ten goal an khung a, chak lo Austria lam tan Sabrina Hruby (13') leh Laura Kern (20') ten an khung ve bawk.

Youth Olympic neih laia field hockey hi 'hockey 5s format' hmanga khelh a ni a, inkhelh hunchhung pawh minute 20 chauh a ni. India hian nizan khan an pool match pahnihna atan Uruguay an hmachhawn a, vawiin dar 12:45 hian Oceania ram Vanuatu an hmachhawn leh ang.

Kolasib tleirawl Siami hi India tan senior level-ah pawh a inlan phak tawh a, a kum a la tam loh avangin youth team-ah pawh a la tel thei. Commonwealth Games leh Asian Games-ah te kum naupang ber nichungin inlan mah se, 2018 Youth Olympic Games-ah erawh India tan inngahna a ni.

Khawvel tleirawl infiammi ṭha rual intawhkhawmnaah hian India tan shooter Tushar Mane chu medal la thei hmasa ber a ni. Mane hian men's 10 metre huangah 247.5 hmuin silver medal a la.

Argentine khawpui Buenos Aires-ah India hian infiammi 46 a tir chhuak a, athlete a tirh hnem ber ṭum a ni; infiamna peng hrang 13-ah an inlan ang. Youth Olympic hnuhnung ber 2014-ah khan silver leh bronze medal pakhat ve ve chiah a la phak.