Mizoram an tlawm

BCCI hnuaia Mizoramin tournament a khelh hmasak berah chhuan tur a nei lo a, nimin khan Vijay Hazare Trophy-a an match hnuhnung ber khelin Bihar lakah wicket kuain an tlawm.

Mizoram hian bat hmasak thlangin over 27.7 thleng bak an tlin lo a, run 83 siamin an out vek! Mizoram tan hian opener AL Rajput chuan run 43 siamin bul a ṭan a, mahse batsman dang aṭangin thlawptu a nei ṭha lo.

Bihar tan opener V Ranjan chuan run 59 siamin a tawp thleng a rawn dam a, over 15.4 lekah an target hi umphain wicket khat chiah an hloh a, hnehna an chang ta a ni.

Ranji Trophy inbuatsaihna Vijay Hazare Trophy-ah hian Mizoram hi tun hnaia BCCI-in a pawm thar state ho awmkhawmna Plate group-ah dah an ni a, table hnuai ber dawtah an awm.

Match riat an khelhah vawi khat chiah an chak a, match khat hi ruah surin an inkhel tur a tihbuai avangin Puducherry nen an khel thei lo a, point an insem.

Team Dinhmun
Team Pld W L T NR Pts NRR
Bihar 8 7 0 0 1 30 3.435
Uttarakhand 8 7 1 0 0 28 1.82
Nagaland 8 5 3 0 0 20 0.909
Puducherry 7 4 1 0 2 20 1.62
Meghalaya 7 4 3 0 0 16 1.144
Manipur 8 2 5 0 1 10 –0.197
Arunachal Pradesh 8 2 5 0 1 10 –1.928
Mizoram 8 1 6 0 1 6 –2.905
Sikkim 8 0 8 0 0 0 –3.182