John Terry a chawl ta

Chelsea legend John Terry chuan football khelh a chawlhsan fel ta a, inkhel dawn tawh lo mah se football chu la la mangṭha vek dawn lo - management lamah lut zui nghal tura ngaih a ni.

England leh Blues captain ni kawp thei Terry hi kum 37 mi a ni tawh a, season hmasa a zawh rual khan Championship club Aston Villa a chhuahsan, club nei lo a nipui transfer a hman zawh hnuah a chawlh thu hi a puang.

A vanglaia defender rorum tak ni ṭhin Terry hian Instagram-ah a chawlh thu hi a puang. Terry chuan, "Kum 23 chhung footballer ka nih tawh hnuah, ngun takin ka ngaihtuah a, ka tan tun hi inkhelh chawlhsan hun ṭha a ni," tiin a sawi.

Terry hian Chelsea tan a vanglai hun a hmang a, London club tan hian match 700 chuang a khelh sak. Stamford Bridge-a hun a hman chhung hian Premier League leh FA Cup nomawi panga ve ve a chawi a, a captain-na hnuaiah ngei mai Champions League-ah an champion bawk - Blues player zinga hlawhtling berte zinga mi a ni.

A tawpna

England tana match 78 kheltu Terry hian Chelsea a chhuahsan hnuah inkhelh a chawlhsan mai lo a, Championship club Aston Villa a pan. Professional player a nih laia a match hnuhnung ber chu May thla a Fulham nen Championship playoff an khelh kha a ni.

Villa Park-ah season khat hun a hman hnuah a contract a pawt sei lo a, thla hmasa khan Spartak Moscow zawm tur anga sawi a ni. Russian club tan hian medical test nei hman ang hiala sawi ni mah se, an chhungkaw lam chuan an pha thung - tunah chuan a inkhel zui dawn lo tih a chiang ta.

West Ham aṭanga bul ṭan ni mah se, Chelsea youth team a zawm zui a; senior career pawh Blues aṭangin a ṭan. Intuaihriam turin Nottingham Forest-ah loan hmangin a chhuak zauh tih mai loh chu London club tan a vanglai a hmang a, a hun tawp lamah erawh Villa tan season khat hun a hmang.

Mangṭha

A naupan lai aṭanga a ngainat leh a nun pui ber football khelh a chawlhsan dawn meuh chuan Terry pawh a ngui a, khelmuala hlawhtlinna a chan theihna chhan pawimawh tak zinga pakhat chu a chhungte thlawpna a hmuh ṭhat vang a nih thu a sawi.

Terry chuan, "Kum 14 mi chauh ka nih lai khan ka hringnuna thutluka lian ber ka siam a, Chelsea Football Club ka zawm. He club-in ka tana thil ṭha tih leh hlimna min thlen zawng zawng hi thu hmanga sawifiah theih a ni lo.

"Khelmual chhung leh pawnah thlawpna ka dawng ṭha a, hun harsa pawh kan paltlang. Nottingham Forest tana ka khel zuai pawh khan puitlinna kawngah min pui, chutih rualin ka thinlung leh ngaihtuahna te chu Chelsea tan a awm reng ang. Tunah chuan ka hringnuna zirlai thar hmachhawn turin ka inbuatsaih a, chona thar hmachhawn tur a awm," a ti.