India fapa rangkachak Mizo rawlthar Jeremy Lalrinnunga
Jeremy Lalrinnunga chuan Youth Olympic Games 2018 neih mekah gold medal a chawi chhuak. Weightlifter Jeremy hian 62 kg category-ah 274kg chawiin pakhatna a ni a, Mizo rawlthar duhawm hi India infiammi zingah Youth Olympic-a pakhatna ni thei hmasa ber a ni.
Nimin zing khan Argentina khawpui Buenos Aires-ah inelna hi neih a ni a, snatch chawi hmasak niin Jeremy hian 124kg chawiin hma a hruai nghal. Chutih rualin a dinhmun hi a la him lo, Turkey rawlthar Toptas Caner nen an inthlauhna chu 2kg chauh a ni.
Hun rei vak lo chawlh an neih hnuah clean & jerk chawi zui niin, Mizo rawlthar hian 150kg a chawi leh nawlh! A elpui Caner-a'n 141kg chauh a chawi avangin a total chu 263kg a ni a, Jeremy hian fal takin hnehna a chang; pathumna chu Colombia aiawh a inlan Villar Manjarres Estiven Jose niin a pumpuiah 260 a chawi ve bawk.
Youth Olympic Games hi tun hmain vawi hnih - 2010 (Singapore) leh 2014 (China) neih a lo ni tawh a, India hian silver leh bronze chu la tawh mah se gold tak hi a la ngai lo. Tunah erawh India history chu ziah danglamin a awm, bung thar kaitu chu Jeremy Lalrinnunga hi a ni.
Jeremy a lawm
Vanglaini chuan Jeremy Lalrinnunga hi 16 September, 2017 khan an chenna Govt. Complex-ah lenchilhin biangbiakna a lo nei tawh; chumi ṭum chuan, "Olympic medal lak hi ka tum a ni a, Mizoram chu ngai viau ṭhin mah ila training kan neih ngawrh em avangin ka rawn haw tawh mai mai lo ang," tiin a lo sawi tawh.
Tumruhna nen Jeremy hian ngawrh takin Army Boys, Pune-ah training a nei chhunzawm a, zan pawh a mengrei ngai lo - dar 10:00-ah a mu ṭhin. Zingah dar 7:00-8:30 chhung training neiin chhunah school an kal a, tlaiah dar 4:30-6:00 chhung training an nei zui leh ṭhin a ni.
Youth Olympic champion Jeremy chuan, "Hlawhtlinna ka chan theih chhan chu Pathian vang a ni, kawng min kawhhmuha min kaihruaitu Mizoram Weightlifting Association leh Sports Council chungah lawmthu ka sawi. Coach Malsawma, Zarzokima leh Vijay Sharma chungah ka lawm takzet," tiin Vanglaini a hrilh a, Mizo mipui amah ṭawngṭai pui ṭhin zawng zawng chungah lawmthu a sawi bawk.
I te ber tawp lo e!
Mizo boxer Lalneihtluanga leh Lalmuanpuii te fapa Jeremy Lalrinnunga hi Mizo naupang dangte ang bawkin a tet te aṭangin infiamna a ngaina nghal a, a pa tuina boxing khel turin a ṭhiante a zui ve ṭhin.
Mahse, a pumrua a lian tawk lo a, a tet bik avang hian boxing an khelhna sirah an ṭhut tir zawk hlauh ṭhin. Boxing ring chhungah a tan hmun a awm lo a, infiam ve a duh ṭhin avangin kawng dang a dap a ngai. September 24, 2011 khan Govt. Complex-ah Weightlifting Academy State Sports Coaching Centre-in a din a. He hmunah hian Weightlifting coach Malsawma Khiangte (SYS) kaihhruaina hnuaiah Jeremy hian a
zinkawng bul a ṭan.
Theihna a awm a, a haichhuak turin coach a awm bawk. Academy-a a luh aṭangin thla khat a liam awrh tihah 'Catch Them Young' hmanga man niin, tualchhung coach kaihhruaina hnuaiah hian zing leh tlaiah trianing a nei ngawrh chho hle.
April 9-13, 2012 chhung khan SAI chuan Army Boys, Pune-a lut tur zawnna a nei a, he hunah hian Mizo naupang panga an inlan - an zing aṭang hian pathum Jeremy, Jacob Vanlaltuanga leh Zakhuma te an tling.
Zirna hmun ṭha leh chang-tlung zawk a zawm hnuah Jeremy hian hnung lam a hawi tawh lo a, boxing khel tura pumraw te bik kha tunah chuan a rualpui leh tiatpui zingah khawvela ritchawi chak ber a ni ta hial.
Jeremy Lalrinnunga Sulhnu
International Level
1 IWF World Youth Weightlifting Championships 2016 56kg Silver
2 Commonwealth Youth Weightlifting Championships 2016 56kg Gold
3 Asian Youth Weightlifting Championships 2016 56kg Silver
4 IWF World Youth Weightlifting Championships 2017 56kg Silver
5 Commonwealth Youth Weightlifting Championships 2017 56kg Gold
6 Commonwealth Junior Weightlifting Championships 2017 56kg Gold
7 Asian Youth Weightlifting Championships 2018 56kg Silver
8 Asian Junior Weightlifting Championships 2018 56kg Bronze
9 Youth Olympics Games 2018 62 kg Gold
National Level
1 11th National Sub Junior Boys & Girls 2016 50kg Gold
2 12th National Sub Junior Boys & Girls 2016 56kg Gold
3 53rd Men and 29th Women Junior National 2016 56kg Gold
4 13th National Sub Junior Boys & Girls 2018 56kg Gold
5 54th Men & 30th Women Junior National 2018 56kg Gold
Lawmna mittui
Youth Olumpic neihna hmun Argentina hi Mizoram aṭang chuan khawvel let liam a awm a ni a, anni rama Thawhṭanni zana inelna an neih hi keini ramah chuan Thawhlehni zing kha a ni.
Zing dar 4:00 bawrah inelna hmachhawn a ni nachungin Jeremy Lalrinnunga te inah chuan in khat tlatin a chanchin ngaihvenin mi an pungkhawm a, a nu leh pa Lalneihtluanga leh Lalmuanpuii te chuan an fapa hlawhtlinna lawmpui tute zawng zawng chungah lawmthu an sawi.
Jeremy nu leh pate chuan, "Kan beisei leh duhthusam chu a takin a rawn thleng, kan rilru chhungrila awm ni mah se kan beisei ngam chiah loh a ni. Kan fapa chanchin ngaihven leh min lawmpuitute an rawn pungkhawm hnem hle a, an chungah kan lawm takzet," tiin Vanglaini an hrilh.
An fapain inelna a hmachhawn hma hian Mizo mipuite chu ṭawngṭai pui turin an sawm tawh bawk a, hlawhtlinna a chan hnuah pawh an mahni thlawp tute an theihnghilh lo. Jeremy nu chuan, "Amen, Amen, Halleluiah,' tih chu Jeremy-a'n gold a lak zawh veleha a 'aw' kan hriat hmasak ber a ni a, Pathian hnena lawmthu sawi mawlh mawlh turin min chah bawk a ni," tiin Vanglaini a hrilh.
Harsatna karah...
Ṭhianho zinga ṭha ber nih a awlsam lo a, mahni chenna veng leh khua aiawhtu nih pawh thil harsa tak a ni. Mipui tluklehdingawn chuang chenna India aiawh nih phei chu a awlsam loh zia sawifiah thiam a harsa zawk hle.
A thiam leh thei fal bik tam tak kara Indian Weightlifting Federation-in ram aiawh tura a thlan Jeremy Lalrinnunga hian awlsam takin hlawhtlinna a chang mai bik lo, kum 10 a pel awrh tihin training nei turin an chenna in lum a chhuahsan a ngai a, nu leh pa tel loin hnam dang karah hun a hmang.
Jeremy hringtu Lalmuanpuii chuan, "Naupangte a nih lai aṭangin a tum a ruh em em a, natna leh harsatna a neih pawh hian kan ngaihtuah lutuk a hlauh avangin a sawi duh ngai lo, a theih ang angin amaha chinfel hi a lo tum ve thin a ni," a ti.
State level intihsiakna lamah Jeremy hi a inlan lo a, inelna puitling a hmachhawn hmasak chu Youth National Weightlifting Championship 2016 kha a ni. Hemi ṭum hian inlan thei lo tura ngaih a ni a, mahse a awma hliam hmun riat zeta an chilh a dam aṭanga thla khat hnu lekah inelna a hmachhawn zui a ni.
Jeremy chuan, "Ka ṭhianpa nen kan infiamna lamah ka awmah mi ti palh a, hmun riatah chilh a ni. Kan hotuten hliam nei chungin inelna hmachhawn an phal lo. Ka hliam dam hnuah thla khat vel chiah training-na hun ka nei zui a, medal hmasa ber ka la thei kha ka vannei hle a ni," tiin Vanglaini a lo hrilh tawh a ni.