Mi bik zinga BER nihna a hauh dan

Summer Youth Olympics-ah ram zawng zawng tel theih a ni lo a, khawmualpui hrang hranga mi bikte tan chauh tel theih a ni.

Jeremy Lalrinnunga telna weightlifting (62 kgs) ah hian lifter 14 chauh an tel a, hengte hi 2017 World Youth C'ships, 2018 African Youth C'ships, 2018 Asian Youth C'ships, 2018 Pan American Youth C'ships, 2018 Oceania Youth C'ships leh 2018 European Youth C'ships a ti ṭha te an ni hlawm.

Government Complex rawlthar Jeremy hi Asian Youth C'ship (silver) leh Asian Junior C'ship (bronze) ah a chet ṭhat avangin tel thei zingah a tel a, hemi zawh hian kumin August thla khan Pune-ah trial nei lehin Argentina a zin thei zingah a tling chiah.

Mizo rawlthar hian Snatch-ah bul ṭan ṭha nghalin 120 kg a chawi nghal a, Turkey lifter Caner Toptas nen an inel nghal. Jeremy hian vawi hnihnaah 124 kg chawi hlawhchham mah se vawi thumnaah 124 kg hi chawi zo ta tho.

Toptas hian a bul ṭanna 116 kg chu gold lak nan a ṭha tawk dawn lo tih hriain 120 kg chawi hlawhchham mah se Mizo rawlthar el turin risk lain 122 kg a chawi a. Snatch bikah hian Toptas-a'n Jeremy a phak lohna chiah hi kg hnih chiah a ni.

Clean & Jerk hmanga inelna neih chhunzawm a ni a, Jeremy chuan bul ṭan nana a hman 142 kg chu a chawi theih nghal avangin gold la turin a dinhmun a ṭha tawh. Amah elpha vetu Turkish lifter Toptas chuan 135 chauhin bul a

ṭan a, Colombian lifter Estiven Jose Villar Manjarres chuan Clean & Jerk-ah 140 kg in ṭan mah se snatch-ah 115 kg chauh a tlin avangin India tan gold a hnai.

Jeremy hian a vawi hnih chawinaah 147 kg chu chawi thei lo mah se a vawi thumnaah 150 kg a chawi ngam a, Mizo rawlthar hi a hlawhtling. Jeremy chawi zat belhkhawm hi 274 kg a ni a, amah hnaih bertu Turkish lifter aiin kg 11 in chawi hnem zawk. Hei chauh hi a ni lo, Uganda lifter Hamdan Lutaaya Sserwanga chawi zat belh khawm 150 kg chu Jeremy-a'n Clean & Jerk-a a chawi zat nen a intluk chauh!

# Hming Ram Snatch Clean & Jerk Total
(kg) (kg) (kg)
1 Lalrinnunga Jeremy India 124 150 274
2 Caner Toptas Turkey 122 141 263
3 Estiven Jose Villar Manjarrés Colombia 115 145 260
4 Emanuel Marian Danciu Romania 115 143 258
5 Carlos David Trejo Gonzalez Venezuela 115 140 255
6 Ronnier Martinez Panama 114 141 255
7 Ezekiel Moses Nauru 105 130 235
8 Reyimbergen Jumayev Tajikistan 109 125 234
9 Antonino Luli Albania 95 125 220
10 Richard Orsos Hungary 95 116 211
11 Jack Dorian Madanamoothoo Mauritius 92 116 208
12 Jett Gaffney Australia 88 112 200
13 Joshua Ralpho Marshall Islands 80 110 190
14 Hamdan Lutaaya Sserwanga Uganda 67 83 150

Weightliftling Kalhmang
Weightliftling hi chi hnihin kalpui a ni a, pakhat chu Snatch niin a dang leh chu Clean & Jerk a ni. Inelna chi hnihah hian Snatch hi tih hmasak zawk a ni a, vawi thum (attempt) an tihna aṭanga a ṭha ber an lak sak a, chumi zawhah chuan Clean & Jerk inelna hi kalpui leh a ni.

Snatch : Ritchawitu (lifter) chuan a hmaa ritchawina thlirtlawn (bar) chu ding leh vei lamah khap khat (1) ve vein a teh ang a, kutphah khinghnihin hnuai lam hawiin nghet takin a man ang. Lei aṭangin thawklehkhatah a lu chungah a chawikang thut ang a, a lu chungah a ban khinghnihin ngil takin a mar chho ang. Hemi chhung hian ke phah chauh lo chuan lei a si tur a ni lo a, ban leh ke te chu ngil taka din chhoh pui tur a ni. Referee-in chhuata dah tur a tih hma loh chuan dah thlak tur a ni lo.

Clean & Jerk : Ritchawitu (lifter) chuan a hmaa ritchawina thlirtlawn (bar) chu ding leh vei lamah khap hnih (2) ve vein a teh ang a, kutphah khinghnihin hnuai lam hawiin nghet takin a man ang. Lei aṭangin thawklehkhatah kar chungin emaw a rem danin thir tlawn chu a chawi ang a, a awmna tur a thlen hma chuan a taksa bung dang a khawih tur a ni lo. Thir tlawn chu a awm (khingkhangruh) chungah nghawng dekin kiu thlepin a awm tur a ni a, heta ṭang hian a remchan danin ngil takin a char chho nghal tur a ni. A ke hma leh hnung lam kar a insiam rem hnuah ngil takin a dah tur a ni a. Referee-in chhuat a dah tur a tih hma loh chuan dah thlak loh tur a ni.