MWA lam thu

Mizoram Weightlifting Association (MWA) president Thangchungnunga chuan an nauin hlawhtlinna a chan chungchangah Mizo mipuite ṭanrualna rah a nih thu sawiin, "Kan zavaia thawhhona Pathianin mal a sawm a ni. Sum, tha leh hun senga sports hmangaihtute vangin lawmna ni kan tawng leh ta.

"Sports-ah hian kan pian milin kan khelh tur kan thlan thiam a pawimawh, weightlifting hi Mizo te pian mil tak a ni. Jeremy hlawhtlin chhan chu a teirei peih vang niin, kum 12 mi vel a nih laia a bul ṭan khan kum 18 velah result duhawm a lang. Olympic medal late chanchin zirchian hian teirei pawimawh zia kan hre thei," tiin Vanglaini a hrilh.

Weightlifting huanga Jeremy bul ṭan puitu SYS coach Malsawma Khiangte chuan, "Pathian hruaina vanga Jeremy hlawhtlinna hi a va lawmawm tak em, mahni chherchhuah ngei mai Youth Olympic Games-a gold medal la lai mit ngeia han hmuh chu a ropui hle mai. Min hruaitu Pathian hnenah lawmthu ka sawi tak zet zet a ni. Jeremy hlawhtlinna kawngah hian Mizoram Weightlifting Association hruaitute, Army Boys Pune chief coach Gubala, Slovakia leh Zarzokima, Army coach te leh India coach Vijay Sharma chungah lawmthu ka sawi tak zet zet a ni," a ti.

Mizoram Weightlifting Association hi SYS weightlifting coach ni ṭhin K. Thanzauva (L)-in kum 1976-a a din a ni a, a din kum hian India Weightlifting Federation hnuaiah inziak lut nghalin, zawi muangin hma lam an pan zel. 2014 Youth Olympic-ah khan Mizo wightlifter dang TBL Lalchhanhima chu a lo inlan tawh a, mahse medal a hlawh chhuak zo ta lo a ni.