India chakna Siami goal hnih

Youth Olympic Games khelh mekah India nula hockey khel thiamte an che ṭha chhunzawm zel. Lalremsiami Hmar goal hnih hmangin Uruguay 2-1 in an hneh leh a, pool match vawi hnih an khelh tawhah hnehna an chang ve ve a ni.

Thawhṭanni zan Buenos Aires, Argentina-a inkhelah Siami'n minute khatna leh 19-ah te goal a khung, a tir leh tawpa goal a khung inkarah hian Uruguay tan Magdalena Verga chuan goal khat a khung ve bawk.

South America ram lakah India nula ten inkhel an thunun hneh hle a, goal zawnah pawh vawi 15 ngawt an vaw thei. Uruguay goalkeeper Victoria Bate chet ṭhat ṭum tawngin dan sak hnem viau mah se India nulate dan vek theih an ni lo.

India hian an match hmasa zawkah Austria chu 4-2 in an hneh tawh bawk a, Mizo nula Siami hian Youth Olympic Games-ah match hnih a khelh aṭangin goal li a khung der tawh.

Vanglaini zawhna chhangin Siami chuan, "Kan khel ṭha, coach ruahman anga kan khel thei a nih chuan hmalam kan pan zel ang. Mimal tak pawhin ka khelh ṭhat ṭhin avangin ka lawm," a ti. India senior team tan pawha inlan phak tawh Siami hi tun inelna bikah hian vice captain a ni.

Nizan khan India hian Vanuatu an hmachhawn leh a, result kan hre hman lo. Zanin dar 9:30 hian inelna thlengtu Argentina nen an inhmachhawn leh ang a, pool match hnuhnung ber atan chuan Ninganiah South Africa nen an inkhel leh ang.