Serchhipah Weekend hmang ila

Mc Dowell's No. 1 Soda Mizoram Premier League Season 7 round 7 chu tunkar tawp hian Serchhip-ah khelh a ni dawn. Mizoram chhunga football inelna sang ber aṭang hian India rama lang phak footballer ṭhahnem tak an chhuak tawh a, Serchhip mipui tan an khawtualah MPL inkhel en theihna remchang a inher chhuak ta bawk.

Mizoten tun hma zawng aiin hna kan thawk nasa tawh a, kartawp chawlh hlutna kan man chho zel a, intuai thar tura intih thawven pawh kan uar chho zel. Tualchhung football ngaina tan chuan Serchhip zinna hun ṭha tak a ni thei ang. Lammuala inkhel en pha lo Serchhip leh a khaw chhehvela awmte tan inelna neihna hmun pan tura hun insiam a pawimawh dawn.

Chennaiyin left back Jerry Lalrinzuala hi Chanmari FC kawr hain a inlan tawh a, Delhi Dynamos forward Lallianzuala Chhangte hi MPL-a Lunglei FC kaipuitu player pawimawh a ni a, Kerala Blasters defender Lalruatthara hi Luangmual FC, Chanmari FC, Zo United leh Aizawl FC tana khel tawh a ni.

Heng bakah Bengaluru defender Sairuatkima (Dinthar FC), Chennaiyin defender Laldinliana Renthlei (Chhinga Veng FC), Jamshedpur forward Jerry Mawihmingthanga (Chanmari FC), NorthEast United midfielder K. Lalṭhathanga (Bethlehem VT & Aizawl FC), Pune City forward Jakob Vanlalhlimpuia (Chanmari FC), Ricky Lallawmawma (Chanmari FC, Aizawl FC & Zo United) leh H. Lalmuankima (Luangmual FC, Chanmari FC & Aizawl FC) te hi MPL-a sulhnu nei tawh vek an ni.

India ram club lian East Bengal-ah pawh Lalramchullova, Brandon VL Remdika leh R. Laldanmawia te an awm mek a, Mizo trio hi MPL chhul chhuak liau liau tiin a sawi thei bawk. MPL hian player ṭha a la chher chhuak dawn chauh niin a lang a, an lar lehzual hnua thlir chauh loin tun hi Mizo player ṭha en theihna hun ṭha tiin a sawi theih.

MPL thlir ṭhang tan pawh Serchhip hi Aizawl pawna inkhel en theihna hun remchang a ni a, inelna neihna tur hmun hi Aizawl aṭangin darkar 4-5 kal lek a ni a. Mahni lirthei nei lo tan pawh Sumo a tlan reng a, Rs 300 chauha thlen chhoh theihna a ni.

ROUND 7 - SERCHHIP
October 12, Zirtawpni
Bethlehem VT 11:30 AM Aizawl FC
Mizoram Police 02:15 PM Chawnpui
October 13, Inrinni
Ramhlun North 11:30 AM Electric Veng
Chanmari FC 02:15 PM Chhinga Veng