Ballon d'Or 2018 ; Liverpool-in player pali an thawh
Ballon d'Or 2018 dawng thei tur player 30 puan kim a ni ta a, khawvela footballer ṭha ber chawimawina dawng thei tur hian Premier League club zingah Liverpool chu player thawh hnem ber an ni a, player pali an thawh.
Manchester City leh Chelsea ten player pahnih ve ve an thawh a, Tottenham Hotspur leh Manchester United player pakhat ve ve an lang a, 'Big Six' tia hminglem an pek zingah Arsenal chu player thawh lo awmchhun an ni.
Real Madrid chu club hrim hrim zinga player thawh hnem ber an ni a, player pariat an thawh. Premier League-a player thawh hnem ber Liverpool aiin player paliin an thawh hnem zawk!
Barcelona, Paris St-Germain leh Atletico Madrid-in player pathum ṭheuh an thawh a, Juventus chuan player pahnih an thawh ve bawk.
Premier League chu
Liverpool-in season hmasa Champions League final an luh an chhawr a, Europe-a club inelna sang ber final an an luh theih nana thawhhlawk tak Roberto Firmino, Mohamed Salah leh Sadio Mane te an lang vek.
Reds player zingah Alisson lang bawk mah se Brazilian goalkeeper erawh season hmasaa AS Roma tana a chet ṭhat vanga lang phak niin a lang.
Premier League champion Manchester City tan nomawi an chawi theih nana thawhhlawk tak Sergio Aguero leh Kevin de Bruyne te an lang a, Chelsea tan season duhawm tak hmang mek Eden Hazard leh N'Golo Kante chu London club aṭanga lang an ni bawk.
Spurs tan Harry Kane a lan laiin United-in Paul Pogba an thawh ve bawk - Pogba lan chhan hi United-a a khelh ṭhat ai chuan France tana World Cup nomawi a chawi vang niin a lang.
Real an nep lo
Real Madrid-in player pariat an thawh a, Gareth Bale, Karim Benzema, Thibaut Courtois, Isco, Marcelo, Luka Modric, Sergio Ramos leh Raphael Varane te an lang.
Spanish club hi Champions League nomawi an chawi avanga player thawh hnem an ni a, Thibaut Courtois hi Belgium tana World Cup-a a chet ṭhat avanga lang a ni thung.
Kum 30 mi Benzema hian season hmasa tluanin match 47-ah goal 12 chiah a khung a, hetichunga Ballon d'Or dawng thei tur zinga a lang hi a mak hle.
Real-in player an thawh hnem viau chungin Luka Modric chu dawn beiseiawm ber a ni a, Croatian midfielder hian World Cup-ah Golden Ball a dawng tawh a, UEFA Player of the Year-ah thlan a ni tawh a, FIFA Player of the Year a ni bawk.
Player dang
Barcelona forward Lionel Messi chu ṭum dang ang bawkin a lang leh a, Juventus forward thar Cristiano Ronaldo a lang bawk. Mahse, World Cup avangin Modric a langsar a, player pahnih indona ang maia ngaih inelna hi Messi leh Ronaldo inelna chauh a ni ta lo.
Juventus aṭangin Mario Mandzukic a lang bawk a, Croatian striker lan chhan pawh hi World Cup vang a ni. Barcelona aṭangin Messi bakah Luis Suarez leh Ivan Rakitic te an lang.
Kum 19 mi Kylian Mbappe chu player naupang ber a ni a, PSG forward hian World Cup nomawi a chawi bakah French club tan season duhawm tak a hmang.
PSG player dang zingah Edinson Cavani leh Neymar an lang tel a, Atletico Madrid-in Antoine Griezmann, Diego Godin leh Jan Oblak an thawh ve bawk.
Lang lo langsar
German champion Bayern Munich-in player thawh an nei miah lo a, season tluana goal 12 khungtu Benzema te an lan laiin match 48-a goal 41 khung thei Robert Lewandowski a lang lo leh lawi si!
Football khawvela hming langsar ber pawl Juventus forward Paulo Dybala tan pawh hmun a awm lo a, season hmasaa Italian club tana a khelhpui Gonzalo Higuain a lang phak bik lo.
Season hmasaa Barcelona-in league leh Copa del Rey nomawi an chawi nana thawhhlawk tak Andres Iniesta tan hmun a awm lo a, khawvel footballer 'hot' ber pawl Philippe Coutinho pawh a lang lo.
Manchester United chhuan-vawr David de Gea chu FIFPro World XI-a a lang chungin Ballon d'Or nominee 30 zingah a tel lo a, PSG defender Dani Alves pawh FIFPro World XI-a a lang chungin Ballon d'Or-ah a lang phak lo.
Ballon d'Or bihchianna
Khawvela footballer ṭha ber chawimawi nana an pekchhuah ṭhin Ballon d'Or hi kartin chhuak football chanchin ziahna France Football chuan 1956 aṭang khan a sem chhuak ṭan a, England international hlui Sir Stanley Matthews chu he chawimawina dawng thei hmasa ber a ni.
French chanchinbu-a editorial staff-te chuan he chawimawina dawng thei tur player 30 chu an thlang chhuak phawt a, ram tin aṭanga journalist thlan ṭheuh pakhat zelin vote an thlak.
Kum ruk chhung chu FIFA nena thawkdunin Ballon d'Or tih a ni a, mahse September 2016 khan FIFA chuan he thawhdunna hi titawpin FIFA Awards a hranin a siam a ni.
Ballon d'Or hi December 3-a sem turin ruahmanna siam a ni a, Paris khawpuiah khawvela footballer ṭha ber puanna hi neih a ni ang.
2018 Ballon d'Or nominees
# Hming Position Ram Club
1 Sergio Aguero Forward Argentina Manchester City
2 Alisson Goalkeeper Brazil Liverpool
3 Gareth Bale Forward Wales Real Madrid
4 Karim Benzema Forward France Real Madrid
5 Kevin de Bruyne Midfielder Belgium Manchester City
6 Edinson Cavani Forward Uruguay Paris St-Germain
7 Thibaut Courtois Goalkeeper Belgium Real Madrid
8 Roberto Firmino Forward Brazil Liverpool
9 Diego Godin Defender Uruguay Atletico Madrid
10 Antoine Griezmann Forward France Atletico Madrid
11 Eden Hazard Forward Belgium Chelsea
12 Isco Midfielder Spain Real Madrid
13 Harry Kane Forward England Tottenham
14 N'Golo Kante Midfielder France Chelsea
15 Hugo Lloris Goalkeeper France Tottenham
16 Mario Mandzukic Forward Croatia Juventus
17 Sadio Mane Forward Senegal Liverpool
18 Marcelo Defender Brazil Real Madrid
19 Kylian Mbappe Forward France Paris St-Germain
20 Lionel Messi Forward Argentina Barcelona
21 Luka Modric Midfielder Croatia Real Madrid
22 Neymar Forward Brazil Paris St-Germain
23 Jan Oblak Goalkeeper Slovenia Atletico Madrid
24 Paul Pogba Midfielder France Manchester United
25 Cristiano Ronaldo Forward Portugal Juventus
26 Ivan Rakitic Midfielder Croatia Barcelona
27 Sergio Ramos Defender Spain Real Madrid
28 Mohamed Salah Midfielder Egypt Liverpool
29 Luis Suarez Forward Uruguay Barcelona
30 Raphael Varane Defender France Real Madrid