Djokovic chak niah Thiem leh Cilic an tla

Sanghai Masters khelh mekah Novak Djokovic-a'n harsa lutuk loa hnehna a chan laiin, player langsar dang Dominic Thiem leh Marin Cilic te erawh hneh nei loin an tla nghal.

Thawhlehni zan inkhelah Serbian tlangval Djokovic hian world number 41 Jere­my Chardy chu 6-3, 7-5 in a hneh. Djokovic hian a khingpui service hi vawi thum a chhuhsak thei a, darkar khat leh minute 23 an inkhelh chhungin a service a hloh ve lo.

Kum 31 mi Djokovic hian Sanghai Masters hi vawi riat a khelhna chiah a ni a, China khawpuiah hian vawi thum a champoin tawh - kuminah pawh nomawi chawi thei tura rinkai ber a ni mek.

World number 1 hlui Djokovic chuan, "Set hmasa zawk bul kan ṭan aṭanga point hnuhnung ber thleng khan ka khel ṭha hle. Kumia kan inkhelhna court hi tun hma zawng aiin ball a kal chakin ka hria a, chuvangin tawnhriat neih tawhte chhawr a har dawn. Fimkhur takin inkhelh a ngai dawn a ni," tiin a sawi.

Inkhel dangah Dominic Thiem chu Matthew Ebden lakah 6-4, 6-7 (8-10), 7-6 (7-4) in a chak lo. French Open finalist hi seeded parukna pek ni mah se season dang ang bawkin hard court-ah beisei a phak lo chhunzawm.

US Open champion hlui Cilic pawh Nicolas Jarry hneh loin a tla. Croatian star hi Japan Open ang bawkin match hmasa berah a chak lo leh nghal a, atan Asia chu inkhelhna hmun nuam tak chu a ni lo.

ATP Finals khel tura in vaw tling tawh Alexander Zverev chuan nimin khan a match hmasa ber khel vein Nikoloz Basilashvili chu 7-5, 6-4 in an hneh a, a match lehpekah chuan Australian tlangval Alex de Minaur nen an inkhel leh ang.