India squad a chiang; China an pan
China nena international friendly match khel tur India squad tihchian a ni ta a, player 22 zingah Jeje Lalpekhlua chu Mizo awmchhun a ni.
Team pahnih hi October 13, tlai dar 5:05-ah an intawng dawn a, Suzhou Olympic Sports Centre Stadium-ah an inkhel ang.
Blue Tigers hi 2019 AFC Asian Cup khel tura inbuatsaih mek an nih avangin team ṭha tum tur zawngin AIFF an hmanhlel a, tunah chuan China an chang ta.
United Arab Emirates-a neih tur Asian Cup-ah hian India hi Group A-ah inelna thlengtu UAE, Thailand leh Bahrain-te nen an awmho a, beiseina an nei sang hle.
Khawiah nge Mizo?
India squad-a Mizo awmchhun Jeje hi squad pumpuiah pawh tawnhriat ngah pawl a ni a, ram tan match 51 inlan tawhin goal 22 a khung a, India tana goal khung tam lamah parukna a ni.
Hnahthial tlangval hian China hmachhawn tur zingah hian India tana inlan tam lamah Sunil Chhetri chiah a tluk lo a, Blue Tigers captain hian ram tan match 102 khelin goal 65 a khung tawh.
Mizo tlangval Lallianzuala Chhangte chu squad-a koh chhin zingah tel mah se player 22 zingah erawh a tel pha ta lo a, Delhi Dynamos forward hian SAFF Championship semifinal-a red card a hmuh kha a tuar niin a lang.
Tun hnaia India squad-a regular taka hmun chang thei Jerry Lalrinzuala leh Lalruatthara chu rin loh takin koh zingah an tel lo a, Intercontinental Cup-a tel Laldanmawia Ralte chu koh a ni lo bawk.
India squad chu
Tun hnaia Indian striker khelṭha ber pawl Balwant Singh chu hruai zingah a tel lo a, ATK striker hruai a nih loh chhan erawh a passport fel tawk loh vang a ni thung.
Sawiselna karah Sumeet Passi chu koh a nih chhunzawm zel a, SAFF Championship-a a tluk loh Manvir Singh erawh koh a ni lo leh lawi si!
Kum 21 mi Farukh Choudhary chu rin loh takin koh a ni bawk a, Manipur tlangval Salam Ranjan Singh chua I League aṭanga player koh awmchhun niin East Bengal defender a ni.
Stephen Constantine-a'n I League player a ko ngai meuh lo a, tun ṭuma chhuanlam tur a neih erawh Indian Super League ṭan a nih tawh laiin I League-in season an la ṭan ve lo.
Tih tak takin...
India coach Stephen Constantine chuan China-ah chak tuma an kal tur thu a sawi. English coach chuan, "Khawvel tan chuan friendly match a ni mai thei a, kan tan erawh a ni ve lo.
"Khelmual kan rah ruala kan tum ber ṭhin chu hnehna chan a ni a, China-ah hian hnehna chang turin kan zin ang. Hnehna kan chang zo lo a nih pawhin zir tur kan neihte zirna hun atan kan hmang ang," a ti.
China hi FIFA ranking-ah 76-na an ni mek a, Italy tana World Cup nomawi lo chawi tawh Marcello Lippi chu coach-ah hmang mekin khawvela coach hlawh hnem ber a ni mek.
Juventus tana Serie A nomawi panga chawi thei coach an neih avangin China hi India lakah tlawm an duh lo ang.