MPL7-ah goal 62 a lut tawh

Mizoram Premier League Season 5 khan round 7 chu Chhangphut Field, Champhaiah khelh a ni a, goal 15 zet a lut. Season liam ta khan round 8 chu Ṭhuamluaia Mual, Lungleiah khelh a ni leh a, goal 9 chiah a lut thung.

MPL7-ah match 24 khelh a ni tawh a, goal 62 lut tawhin match tina 2.58 goal lut ang a ni. Tun season hian first round-a goal sarih a lut tih loah chuan round tinah goal 10 a lut tling vek a, chuvangin Serchhip-ah pawh hian goal tam zawk hmuh a beisei theih ang.

Serchhip mipuiin an la hmuh tam loh tur chu ball thar Nivia Antrix hi a ni a, he ball hi a thlawh chak avangin goalkeeper tan mangchhia thlentu tiin a sawi theih.

Chawnpui midfielder Vanlal-thanga leh Chanmari forward Lalnunzama ten goal nga ve ve khung tawhin top scorer an ni mek. Hualngohmun tlangval Thanga hian freekick aṭangin goal thum a khung tawh a, goal dang pahnih zinga pakhat zawk hi halfway line pelh hret aṭanga kawh zeta a pet luh a ni bawk.

Thanga chuan, "Ball thar hi hriatthiam a har em em a, hemi avang hian team training zawhah pawh a hranpain ka pet nasa. Hualngohmun field-ah ka pet nasa takzet a ni," tiin Vanglaini a hrilh tawh a, Huangohmun tlangval thawhrimna hi tualchhung football ngainatute mit titlaitu a ni mek a, Serchhip pawh hian a ṭhen a zar chu an hmuh a ngei a rinawm.

Goal li khung tawhtu Electric Veng midfielder Isak Vanlalpeka'n freekick aṭangin vawi thum tho a khung tawh bawk. Freekick aṭang chauh ni loin open play aṭangin goal mawi tak tak a lut fo bawk.

Tun dinhmuna Lammuala aia khelmual ṭha zawk daih Serchhip khelmualah hian goal mawi zawk leh inkhel hmuhnawm a beisei ngam ang.

Hming Club Goals
Vanlalthanga Chawnpui 5
Lalnunzama Chanmari FC 5
Isak Vanlalpeka Electric Veng 4
David Lalchhuanawma Electric Veng 4
F. Lalremsanga Aizawl FC 3
MS Dawngliana Chhinga Veng 3
Alfred Kemah Jaryan Aizawl FC 3
Laldinliana Varte Bethlehem VT 2
Mark Zothanpuia Chanmari FC 2
David Laltlansanga Chawnpui 2
Lalliansanga Ramhlun North 2
C. Lalrintluanga Bethlehem VT 2
Lalfakzuala Mizoram Police 2
Lalramtharmawia Mizoram Police 2
F. Lalrinpuia Mizoram Police 2