Serchhip-ah Serchhip tlangval

Mc Dowell's No. 1 Soda Mizoram Premier League Season 7 round 7 chu Serchhip-ah khelh a ni dawn a, Mizorama football inelna sang berah hian Serchhip tlangval pahnih Mark Zothanpuia leh Vanlalnghenga te an awm.

MPL-a vawi hnih champion tawh Chanmari FC tan Mark Zothanpuia a khel a, Serchhip tlangval hian MPL7-ah goal ropui ṭum hnih a khung tawh a, chakna goal a ni ve ve. Mark-a hian Bethlehem Vengthlang FC lamah minute 88-naah goal mawi bik a khung a, chakna goal khung bawkin man of the match-a thlan a ni.

Mark-a hian Serchhip zin hma round hnuhnung berah Mizoram Police lakah goal awmchhun a khung leh bawk a, Chanmari FC hian Ser-chhip tlangval hi kawl lo se point ruk an hmuhnaah point hnih chauh an hmuh dawn tihna a ni a. Tuna point 10 hmua table-a pathumnaa awm mek Chanmari hi Mark-a goal khung tel lo chuan point ruk an hmu ang a, paruknaah an awm pha chauh ang.

Serchhip tlangval Nghenga erawh defender a nih avangin langsar taka chet a la ngah lo a, amaherawhchu Chawnpui tlarhnung tiphuitu zinga mi a ni a. Season liam ta khan Nghenga hi Chanmari West tan a khel tawh bawk.

A vawi khat nan Serchhipin Mizorama football inelna sang ber an thleng dawn a, MPL inkhel en hrim hrim piah lamah an khaw fachuam pahnih inkhel lai thlir chu an bat a ni.