Mo Salah telna Liverpool hmaah Foxes

Pathianni zanah Egypt tan Africa Cup of Nations final a khel a, Thawhlehni zan khan Mohamed Salah chuan Liverpool training a zawm leh der tawh!

Zanin dar 1:15 hian Liverpool chuan league match khel turin Leicester City an mikhual dawn a, Jurgen Klopp chuan Salah hi inkhel tura a inpeih tawh thu a sawi der.

Liverpool hian league match 22 khel tawhin table-ah pahnihna an ni mek a, he thu buatsaih lai hian hmahruaitu Manchester City aiin point kuain an hniam a, match khatin an khel tlem thung.

Merseyside club-in champion an duh chuan tlawm a thiang tawh lo a, an mikhual tur hi team ṭha Leicester City an nih avangin a awlsam lo ang.

Salah a inpeih
AFCON final-a Senegal an ngam loh hnuah Salah-a'n chauh pawh sawi loin Liverpool a pan nghal a, training a zawm der tawh. Klopp chuan, "Mo-a'n ka hnena a sawi hmasak ber chu,'Ka inpeih tawh,' tih hi a ni," a ti a, a player inpekna chu a fak.

Klopp chuan sawi zawmin, "Player tawnhriat nei ṭha a ni a, a in fit ṭha hle bawk. Uluk takin training a nei ang a, engnge a an zel kan hria ang chu," a ti a, amah lam inpeih viau mah se bul a ṭan lo a nih pawhin a mak lo ang.

Salah hian tun season inelna hrang hrangah match 26 khelin goal 23 a khung tawh a, assist vawi kua a nei bawk - Reds tana a ṭangkaizia inhrilh nawn a ngai lo.

Chutihrual chuan Egyptian forward hian bul a la ṭan thei lo a nih pawhin Liverpool-in Roberto Firmino, Diogo Jota leh Takumi Minamino an nei sa a, Luis Diaz chu tun hnaiah an nei thar bawk - Divock Origi-a'n dam lam a pan mek bawk.

Khawiah nge Mane?
Salah-a'n training a zawm laiin Mane-a la haw ve lo a, AFCON-ah Senegal a champion pui miau avangin dem theih a ni lo - Klopp pawhin a player hi an champion chu hlim taka lawm phawt turin a duh.

German coach chuan, "AFCON nomawi chawi hi Mane tan chuan a hlu em em a, amah ṭantu mipuite tan a hlu a, Senegal mipui tan a hlu a ni. Chu chu keini pawhin kan hria a, ko let tura hmanhmawh kan tum lo.

"Hlim taka hun hman an phu a, an duh ang ngeiin lawm phawt rawh se," a ti a, Mane ko let tura an hmanhmawh loh thu a sawi.

AFCON hmaa Mane leh Salah ten Liverpool tana an khelh hnuhnun ber chu Chelsea nen 2-2 a an inhnehtawk kha a ni a, hetih chhung hian tlawm an nei lo - league match hnih an chak a, FA Cup match hnih an chak a, League Cup semifinal match hnihah Arsenal an hneh ve ve bawk.

Harh a hun
Result aṭanga en chuan Salah leh Mane tel lo pawhin Liverpool an buai lo a, Leicester thawnthu erawh a danglam thung - January-a inelna hrang hranga match li an khelh tawhah vawi khat chiah an la chak!

Foxes hian an match hnuhnung berah FA Cup fourth round an khel a, Championship club Nottingham Forest chuan 4-1 in an lo sawp a, coach Brendan Rodgers a lungawi lo hle.

Liverpool boss hlui hian, "Player tam takin top player emaw an inti a, chu dinhmun erawh an la hlat hle si," tiin Forest an ngam loh zawhah a naute na takin a khak a, zaninah player a siksawi nual a nih pawhin a mak lo ang.

Rodgers chuan, "Ni tin an training ka en a, ṭhenkhat tan chuan tun pawh hi an mang ram ang mai a ni a, FA Cup kan champion tawhna kha an tan a tawk a ni mai thei a, ka tan a tawk ve lo," a ti - a player-te inpe lehzual turin a duh a, zaninah engtinnge an chhan dawn a hriat ang.

Min ngaidam ru
FA Cup-a an tlawm hnuah Leicester midfielder Youri Tielemans-a'n fan-te hnenah ngaihdam a dil a, "Kan fan-te hnenah ngaihdam ka dil a, an ai kan awh zo lo hle tih ka hria a ni," a ti a, a inthiam lo.

Mahse, Foxes fan-ten ṭawngkaa ngaihdam dilna mai ngaihthlak an duh dawn lo - khelmualah result ṭha hmanga player-ten thupha an chawi an beisei dawn a, Anfield-a leng tur an nih avangin a awlsam lo ang.

Chutihrual chuan Foxes hian December-a Liverpool an mikhual ṭum khan 1-0 in an hnehna an chang a, Rodgers-a'n Anfield a hriatchian tawh bawk avangin inbuatsaihna an neih ṭhat ngei a rinawm.

Foxes hian hliam vangin Jonny Evans, Timothy Castagne, Jamie Vardy, Ryan Bertrand leh Wesley Fofana te an la chhawr thei dawn lo a, AFCON champion team-a tel Nampalys Mendy pawh a la inlan thei lo ang.