Morocco tan Ziyech inlan tawh dawn lo

Chelsea winger Hakim Ziyech chuan coach Vahid Halilhodzic nen an inhmuh thiam loh avangin ram tana inkhelh a chawlhsan thu a puang a, kum 28 mi lek ni mah se Morocco jersey ha chungin Ziyech kan hmu tawh dawn lo tihna a ni.

Atlas Lions (Morocco sawina) tan Ziyech hian match 39 khelin goal 17 a khung tawh a, mahse, coach nen an inhmuhthiam loh avangin nikum June hnuah khan ram tan an inlan leh tawh lo - AFCON squad-ah pawh telh a ni lo.

Ziyech chuan, "National team-a kir tumna ka nei tawh lo a, hei hi ka thutawp chu a ni. Club tana ka tih theihah ka rilru ka pe tawh zawk ang," tiin a sawi.

Chelsea winger hi Bosnian coach Halilhodzic nen hian June thla hnuah khan ṭawngkain an inbei fo a, World Cup qualifying match ruk an khelhah koh a ni lo vek a, thla thara Democratic Republic of Congo nena an World Cup playoff (two-legged) inkhel turah pawh koh a nih a rinawm loh sa.

Ziyech chuan, "Mi zawng zawngin kan inkar thil thleng chu an hre vek. He thutlukna siam a ngai hi pawi ka ti a, mahse, hei hi ka thutawp chu a ni. Kan national team coach-in thutlukna a siam tawh a, a thutlukna chu ka zah a ni. Tunah chuan Chelsea chiah ka ngaihtuah tawh ang," a ti.

Ajax winger hlui Ziyech hian age level-ah Netherlands tan a khel ṭhin a, mahse, Netherlands-a piang player hian kum 2015 khan a thisen zawmpuite lam hawiin Morocco tana senior level-a inkhelh a thlang a, tun hi a tawpna a ni ta si a ni.