Del Potro tan match hnuhnung?

Juan Martin del Potro chu kum hnih leh a chanve hnuah a inkhel leh a, a chak lo nghal. Match a khelh zawhah Argentine tlangval hian mittui nen tennis court a chhuahsan a, a match hnuhnung ber a nih theih thu a sawi.

Nimin zing Argentina Open inkhelah Del Potro hi Federico Delbonis lakah 6-1, 6-3 in a chak lo. An rama inkhel entute hriat turin Del Potro chuan, "Kan inhmuh tawpna a nih hmel," tiin a sawi a, tennis a chawlhsan tur thu tak sawi tlang lo mah se a chawl dawn niin a ngaih theih.

Kum 33 mi Del Potro hi player ṭha bik a ni, mahse hliam vangin beisei angin a hlawhtling tawk lo. Tun ṭuma a lo kir lehnaah hian a tira a ruahman dan chuan Argentina Open bakah Rio Open khelh a tum.

Mahse, nimina match a khelh zawh hnuah Del Potro chuan, "Doctor ka hmu leh phawt ang, ka khup hi dim taka ka enkawl a ngai a ni. Tun ṭum hi ka match hnuhnung ber a nih chuan ka hlim khawp ang," tiin a sawi.