Xhaka leh Partey inkhel thei dawn

Arsenal midfielder pahnih Granit Xhaka leh Thomas Partey te chuan hremna an hmang zo tawh a, manager Mikel Arteta-a'n a duh a nih chuan zanin dar 1:15-a Wolves an lenchilh hunah a chhawr thei tawh ang.

January thla chhung khan Gunners hi midfield-ah an buai hle. Xhaka leh Partey an hrem bakah Nicolas Pepe leh Mohamed Elneny te chu African Cup of Nations khelin an feh chhuak - tunah chuan an player te an kir leh tawh hlawm.

Xhaka leh Partey inkhel thei tur hi Arsenal tan chanchin ṭha a ni. Anni pahnih hian season kal laiah vawi ruk chiah inkhel bul an la ṭan dun a, hengah hian vawi li an chak - hliam leh hrem vangin an lut rual tam lo.

Gunners hi Tottenham Hotspur nen an inkhelh tur pawh a hun sawnhlat sak an ngai hial a, tunah chuan player langsar zingah khel thei lo tur an awm ta lo. Spanish manager Arteta tan player remkhawm a nuam ve leh ta deuh ang.

Arteta naute hi FA Cup leh League Cup aṭangin an tla tawh - European football an khelh phak bawk si loh avangin Premier League chauh an ngaihtuah thei tawh. Zaninah hian an chak a nih chuan Manchester United kalsanin palina dinhmun an luah thei dawn.