Man United tan Champions League khelh a harsa dawn

Manchester United chuan Thawhlehni zan khan Turf Moor an tlawh a, Burnley nen 1-1 in an inhnehtawk. Mikhual team-in Paul Pogba hmangin goal khung hmasa mah se Clarets-in Jay Rodriquez hmangin an sut.

Ralf Rangnick hote hi Premier League table-ah panganaah an tla thla a, an hnuaia awm Arsenal, Tottenham leh Wolves ten khelhzat inangah an lehpelh theih avangin season thara Champions Leauge khelh phak a harsa dawn.

United an mawi
Burnley lakah German manager Rangnick-a'n Cristiano Ronaldo bench-ah dahin Edinson Cavani-a'n bul a ṭan a, Uruguayan forward hi Bruno Fernandes, Jason Sancho leh Marcus Rashford ten an thlawp.

Covid-19 positive vangin Alex Telles leh Fred te khel thei lo mah se table mawngphaha awm Burnley hneh thei turin Man United squad a ṭha a, chhuanlam neih a thiang lo.

Man United hian bul an ṭan ṭha a, Fernandes-a freekick chu Raphael Varane-a'n a tauh goal. Amaherawhchu VAR hmangin an en let a, offside position-a awm Harry Maguire-a'n Clarets player Rodriguez a dan avangin goal hi pawm a ni lo.

Minute 18-naah team goal mawi hmuh tur a awm zui a, Rashford-a'n amah thlawp tura overlapping la Shaw hnehah ball a pe. English left back Shaw hian cross nghalin Pogba-a'n tawih zetin a pet goal.

Man United an mawi zel a, mual sirah Sancho a ball thiamzia hmuhin a awm. Man United an vanduai a, Shaw a ball vawrhluh chu Rashford-a'n box laiah cross lutin Josh Brownhill-a'n an lamah ti lut mah se Pogba a foul avangin pawm a ni lo. Minute 45 an khelh dana thlirin Rangnick-a hoten point thum an hmu ngei dawn niin a lang.

United an zuih
Burnley-in second half ṭan chiahah Man United an barakhaih a, England defender Harry Maguire chetsual rah an seng tih theih mah se player thar Wout Weghorst leh Rodriguez ten an ti ṭha hrim hrim.

Clarets player thar hian Maguire leh Scott McTominay te karah ball la chhuakin Rodriguez ball a pe a, kum 32 mi Rodriguez-a'n a career bika league goal 100-na a khung.

Man United-in chakna goal khung theih nan hun an ngah a, amaherawhchu point hlawh chhuak turin David de Gea puihna an mamawh zawk. Spanish keeper hian Weghorst-a shot ṭha zet a dansak.

Insiamṭhat mamawh
Man United manager lailawk Ralf Rangnick chuan, "First half-ah khan tun aia ṭha khan a khelh theih tawh chuang lo. Goal thum kan khung a, goal hnih min pawmsak lo. Goal hnihna ngat phei chu tumahin an pawm loh chhan kha an hre lo ang. Engpawhchu nise halftime-ah khan 2-0 in hmahruaitu tur a ni," tiin referee thutluknaa a lungawi loh thu a sawi.

Insiamṭhat an mamawh thu sawi zuiin German manager chuan, "Middlesbrough nen khan tun ang chiah hi a thleng. Inkhel kan thunun a, a tawpa pawimawh ber erawh chak a ni. Burnley lakah minute 94 hnua point khat chauh hlawhchhuah hi lawm ngaihna a awm lo," tiin a sawi.