Mapgies-in Lampard-a 'Everton' an hneh

Premier League relegation battle a ngaihnawm dawn chauh. Thawhlehni zan khan Newcastle United-in Frank Lampard hnuaia phur thar Everton chu 3-1 in an sawp a, relegation zone an chhuahsan. Roy Hodgson-a kaihhruai Watford erawhin West Ham United an hneh lo a, 19-naah an awm.

Burnley-in Manchester United lakah point hlu tak an hlawhchhuak a, Clarets hian Arsenal leh Watford lakah point an hlawhchhuak tawh bawk. Sean Dyche-a hote hian point 14 hmuin table mawngphahah awm mah se Watford nen an inkarah point khat chiah a awm a, a him china awm Magpies nen pawh point li chauhin an inthlau a ni.

Watford erawh West Ham lakah 1-0 in an tlawm. Hammers tan Jarrod Bowen-a'n goal awmchhun a khung a, David Moyes-a hote tan Champions League khelh beiseina a sang leh sawt. Roy Hodgson hote erawh Premier League khel zel turin hmabak a khirh dawn hle.

Newcastle 'thar'
Newcastle United-in January transfer-a player panga an lak zinga pathum Kieran Trippier, Chris Wood leh Matt Targett te bul an ṭantir a, player man to ber Bruno Guimarães pawh second half-ah dah luh niin centre back Dan Burn erawh bench-ah a ṭhu tluan.

Magpies-in nung takin bul an ṭan a, amaherawhchu Everton-in goal an khung hmasa zawk. Minute 36-naah mualneitu defender Jamaal Lascelles-a'n an lamah tilut mah se Magpies hian second 108 hnuah an sut nghal. Lascelles ball tauh per chu Everton defender Mason Holgate-a'n an lamah a tilut.

Second half-ah Newcastle an hmuhnawm chhunzawm a, Allan Saint-Maximin cross chu Ryan Fraser-a'n minute 56-naah a khung. Magpies an phur a, St James Park boruak a ṭha. English right back ball pet thiam Kieran Trippier-a'n minute 80-naah mawi zetin freekick aṭangin a khung.

Tun season-a a vawi khat nan match zawnin Newcastle an chak a, relegation battle-a awm club tan chuan hmasawnna lian tak tih loh rual a ni lo. Magpies boss Eddie Howe chuan, "Player-ten khelmuala awm an phu reng laia bench-a dah hi a hlauhawm. Bruno hi player ṭha tak ni mah se team thara a awm chuan a inzir ve phawt a ngai," tiin Brazilian midfielder bench-a a dah chhan a sawi a, team boruak ṭhat thu a sawi tel bawk.

Everton an buai
Everton-in Frank Lampard hnuaia an match hmasa berah Brentford 4-1 ngawtin sawp mah se FA Cup a ni a, inelnaah hian Manchester City, Liverpool, Chelsea leh Tottenham te an la awm avangin champion kawng a la thui.

Tun season-a pawimawh ta ber chu Premier League-a inham tan a ni a, Newcastle laka an khelh dan thlirin Toffees tan a awlsam dawn lo. Player thar Dele Alli leh Donny van de Beek te bench aṭanga an luhtir chungin Magpies an khan lo hle.

English manager Frank Lampard chuan, "Player-ten inrintawkna an nei lo a, awlsam tea siam ṭhat theih a ni lo. Premier League a ni a, inelna harsa tak a ni. Thawhrimna hmangin kan harsatna hi kan su kiang thei a, inrintawkna pawh kan nei let ang. Chak loh chang hi a awm tur a ni a, kan inkhelh tur atana player inpeih tura siam hi ka hna chu a ni," tiin a sawi.

Everton hi 16-naah an awm mek a, Newcastle United aiin point khat chauhin an hmu tam. Nizan inkhela relegation zone-a awm Norwich City-in Crystal Palace an hneh phei chuan Canaries leh Toffees point hmuh zat hi a inang hial ang.