Indian Sportswoman of the Year dawng tur chhawp chhuak

British media lian leh rintlak BBC chuan a vawi thum nan Indian Sportswoman of the Year a thlang dawn a, chawimawina dawng thei tur Indian hmeichhe infiammi panga chhawpchhuah an ni.

Award dawng tura chhawp chhuahte hi - golfer Aditi Ashok, boxer Lovlina Borgohain, weightlifter Mirabai Chanu, Para-shooter Avani Lekhara leh badminton player PV Sindhu te an ni.

Kum 2021 chhunga che ṭhate thlan an ni a, ram tana an hlawhtlinna hrang hrang aṭanga teh an ni. Award dawng tura duh hi BBC website lamah vote thlak theih a ni; February 28 thleng Mizo tan pawh mahni duhzawng a thlan theih.

Aditi Ashok (Golf)
Aditi Ashok hian golf a luhchilh hnuah India hmeichhe golf khel zinga beiseiawm ber a ni chho a, kum 18 mi lek ni chungin 2016 Rio Olympic-ah khan ram tan a lo feh chhuak tawh a ni.

Kum 23 a ni tawh a, Tokyo Olympic-ah khan India aiawhtu zingah a tel leh, medal la phak chiah lo mah se LPGA Tour lama a sang zual 10 zingah a tel phak tawh hial a, ram chhungah golf infiamna chawi lar zualtu tiin a sawi ngam.

Lovlina Borgohain (Boxing)

Tokyo Olympic-ah khan Lovlina Borgohain hian bronze medal a hnek chhuak, Indian boxer zinga Olympic medal la thei pathumna a ni. 2017 Asian Championship khan bronze medal a lo la tawh bawk.

Assamese nula hi kum 24 mi a ni a, a unau te aṭanga boxing hi tui a ni. Commonwealth Games leh World Championship-ah pawh India aiawha feh chhuak tawhin, bronze medal a lo hnek chhuak tawh bawk a ni.

Mirabai Chanu (Weightlifting)

Mirabai Chanu tan nikum kha kum ṭha bik a ni. Tokyo Olypic-a silver medal a chawi chhuah kha Indian weighlifting tan mellung pawimawh a ni, infiamna khawmpui lian bera Indian weighlifter zinga medal la thei hmasa ber a ni hial.

Manipuri nula hi 4ft 11in chauha sang a ni a, mahse khawvel hriat khawpin theihna a nei sang. World Championship 2017-ah khan 48kg huangah gold medal a lo chawi chhuak tawh, chhungkaw harsa tak aṭanga seilian ni mah se a retheihnain a nih tum a dal zo lo.

Avani Lekhara (Para-shooting)

Motor chetsualnaah a tel avangin Avani Lekhara hian wheelchair a hman a ngai, mahse infiamna lamah erawh sang takah a ding thei thung. Kum 20 mi Lakhera hi Indian hmeichhe zingah Paralympic Games-a gold medal la thei hmasa ber a ni.

Vohbikte tana inelna neih ṭhin Paralympic Games-ah khan 10m air rifle-ah hlawhtlinna a chang. 50m rifle huangah pawh bronze medal a la bawk, infiamna huanga hming a chher bakah hian dan (law) a zir mek.

PV Sindhu (Badminton)

Badminton player Pusarla Venkata (PV) Sindhu hi Indian hmeichhe zingah chuan mimala Olympic medal vawi hnih dawng thei hmasa ber a ni. Rio Olympic-a silver medal a lak hnuah Tokyo 2020-ah khan bronze medal a la leh bawk.

World number 1 dinhmun pawh a hauh zak zak tawh a, inelna lian 2019 World Championship-ah khan lo champion tawhin, hlawhtlinna lian leh hrawl tak tak a nei hnem tawh hle.