Turkey lamah Trezeguet a kal

Aston Villa forward Trezeguet chuan loan hmangin Istanbul Basaksehir a zawm. Turkish Super Lig club tan hian tun season tawp thleng a khel phawt ang, an inremnaah a nghetin an la ngei ang tih erawh a tel lo.

Kum 27 mi Trezeguet hian nikum April thla khan a khupah hliam na tak a tuar, a hliam dam hnuah pawh Villa tan a khel phak ta meuh lo. Premier League season kal laiah match khat chauh a la khel a ni.

Aston Villa tan khel phak lo mah se Egypt tan erawh hmun pawimawh a la chang. Africa Cup of Nations-ah hian an ram tan match sarih a khel vek a, champion phak ta chiah lo mah se pahnihna dinhmun an luah.

Egypt match hmasa berah bul a ṭan a, a hnu lam match parukah erawh bench aṭangin a lut. Quarterfinal-a Cameroon an hnehna goal pawimawh a khung a, final-a Senegal nen an inkhelh ṭum pawhin second half-ah bench aṭangin a tlan lut bawk.

Al Ahly leh Anderlecht tana khel tawh Trezeguet hi Kasimpasa tan pawh a lo khel tawh, beiseina sang tak nen Villa a pan. Tunah chuan Turkish Super Lig lama pangana tan a khel leh ta zawk dawn a ni.

Trezeguet-a kalsan Villa hi Premier League-ah 11-na an ni mek, nizan khan Leeds United nen an inkhel a, an chak bakah Leicester City-in point an hloh a nih chuan a sang zual 10 zingah an inhlangkai phak chiah ang.