Bagan-in hmahruaitu Hyderabad an hneh

Indian Super League-ah 'top four' dinhmun a nghet hleithei lo - Thawhlehni zan khan ATK Mohun Bagan chuan 2-1 in hmahruaitu Hyderabad an hneh a, palinaah Odisha FC lehpelin an invawrhkai ve leh ta.

Kolkata club tan Liston Colaco leh Manvir Singh ten goal khat ve ve an khung a, 2-0 a nih hnuah Hyderabad tan Joel Chianese chuan si phurh sut ṭhen ve leh mah se goal dang a lut tawh lo a, 2-1 in inkhel a tawp.

Hyderabad-in table chung ber la luah chhunzawm mah se an hmahruai dan erawh a derthawng tawh hle - palina Bagan aia an sanna hi point thum chauh a ni tawh a, match hnihin an khel tam zawk bawk.

ISL-ah top four chinin semifinal an khel dawn a, an point neih dan thlirin, team 11 inelnaa team pakua chuan top four-a league round khar turin beisei an la nei thei vek - ISL a hmuhnawm tawlh tawlh dawn.

Hyderabad an vanduai
Athletic Stadium, Bambolim-ah inkhel ṭantir aṭangin boruak a 'hot' nghal a, Bagan-in semifinal khelh ngei an duh avangin an nawr na nghal hle - mahse, an thiampuipa Hugo Boumous leh season duhawm tak hmangtu Liston Colaco ten an chance neih an chhawr thei lo.

Hyderabad tan Nikhil Poojary-a'n a hun ṭha neih hming chher nan a hmang thei bik lo a, goal lut loin chawlhlawk hman a ni. Minute 51-naah Hyderabad-in freekick an hmu a, Chianese pet chu Bagan tlarhnungin lo dang per mah se Rohit Danu ke bulah tak a tla.

Kum 19 mi forward Danu hian ṭha zetin a shot a, goal bar chhung lam a per - a per lehlam hi goal chhungah a sawt niin Hyderbad lamin an ngai a, mahse, referee-in ngaihdan dang a neih avangin goal-ah pawmsak an ni lo.

Hyderabad-in goal an khunga an inngaih laiin pawmsak an ni lo a, Kolkata club-in counter attacking football hmangin an nawr let zui -David Williams hnen aṭanga ball duhawm dawngtu Colaco chuan goal-ah a chantir a, minute 56-na a ni.

A pawi zo ta
Bagan goal khung aṭangin minute thum a liam hman lo - Kolkata club bawkin goal an khung chhunzawm a, Finland international Joni Kauko chuan Manvir Singh tan mawi zetin ball a siamsak a, Indian striker hian ṭha taka lalutin goal-ah a chantir zui.

Hyderabad an beidawng duh bik lo - Joao Victor-a shot chu Amrinder Singh chuan lo dang per mah se Chianese ke bulah tak a tla a, Australian winger hian si phurh sut ṭhen nan a hmang.

Indian rawlthar duhawm Danu bawkin Hyderabad tan si phurh sutna hun duhawm a nei leh a, mahse, a vanneih zan a ni lo - Amrinder Singh-a'n a dansak a, scoresheet-ah a hming a ziak thei lo.

Bagan tan Colaco-a ke hmui deuh se hattrick siam thei a ni - vawi hnih ngawt goal ruaka khung turin chance duhawm a nei a, Goan forward hian a khung lo ve ve. Hun tawp thlengin goal dang a lut lo zui a, 2-1 in Bagan an chak a, semifinal beiseina a nung lehzual ta.