Derby County beisei a sang zel

Wayne Rooney kaihhruai Derby County chuan Thawhlehni zan khan Hull City 3-1 in an hneh a, season thara Championship khel chhunzawm turin beiseina an chhi nung zel.

Rams tan hian Craig Forsyth, Tom Lawrence leh Festy Ebosele ten goal khat ṭheuh an khung a, Hull City goal awmchhun hi Forsyth-a'n an lama tihluh a ni.

Derby chanchin in ngaihven a hlawh chhan hi an club inrelbawlna fel loh vanga point 21 zet paihsak a nih vang a ni a, point ṭhahnem tak paihsak an ni chung hian Rooney hote hian point 18 an hmu tawh. Rams hi 23-naah an awm a, an chunga awm Peterborough an phak lohna chu point hnih chauh a ni.

Ni 61 (December 10) liam ta khan Derby hian him turin point 20 an hmuh a ngai a, tunah chuan point li chauh him turin a ngai tawh. Manchester United leh Everton striker hlui Rooney hian Rams hi dinhmun harsa an tawh laiin a phasan duh lo a, amah chher chhuaktu Toffees sawmna a hnawl.

Derby ṭantute pawhin Rooney leh a player-te hi an thlawp ṭha a, inkhel entu an neih ṭhat bakah Hull City an hneh ṭum hian thawm an nei ṭha hle.