Roma hnehin Inter an tlang

Jose Mourinho enkawl AS Roma chu Inter Milan hneh loin Coppa Italia quarterfinal aṭanga pet chhuah an ni. Inter hian semifinal-ah chuan AC Milan leh Laizo inkhela chak zawk an hmachhawn leh ang.

Thawhlehni zan quarterfinal inkhelah Inter tan Edin Dzeko leh Alexis Sanchez ten goal khat ve ve an khung a, an mikhual lakah 2-0 in hnehna an chang. A kalna lam apianga nomawi chawi ṭhin Mourinho-a'n kumin chu nomawi a chawi dawn lo niin a lang ta.

San Siro-a inkhelah Inter fans lamin 2009-10 season treble champion nih puitu Mourinho hi an lo la theihnghilh lo. Portuguese manager hi a hming lamin hla an sa ring hle, mahse a chungah zahngaihna erawh an lantir thei chuang lo.

Serie A hmahruaitu hian inkhel thunun tak chungin hnehna an chang. Arsenal forward hlui Sanchez-a'n an goal khatna luh theih nan tha a thawh bakah, box pawn aṭangin an goal hnihna hi mawi zetin a hlap lut.

Chile international hian hun rei tak chhung chu beisei a phak lo. Manager thar Simone Inzaghi erawhin a hmang thiam viau a, player hriam tak a ni leh tawh - a match hnuhnung 10 aṭangin goal nga a khung a, ṭhiante tan a ṭangkai thei hle bawk.

Kum 33 mi Sanchez chuan, "Milan Derby ai kha chuan kan khel ṭha zawk, kan chak lohna khan zirlai ṭha tak min zirtir a, a rah chu tunah kan hmu. Roma hi team ṭha tak an ni tih kan hria, fimkhur tak chungin kan bei," a ti.

Sawi zawmin Sanchez chuan, "Tun hma aṭangin ka ngaihdan a la pangngai reng, kei chuan inkhelh tam ka duh. Khelmual chhunga hun ka hman tam hian inrintawkna ka nei a, ka khel ṭha ṭhin bawk. Hun tawp dawn lam minute 15 vel chauh khelh hi chu a harsa," a ti.