Champion lai lakah Lakers an tlawm

LeBron James, Anthony Davis leh Russel Westbrook te chu Los Angeles Lakers tan an rawn ding chhuak a, mahse anni aia palian zawk Giannis Antetokounmpo a lo awm si; nimin zing khan Lakers hi Milwaukee Bucks lakah 131-116 in an tlawm.

Crypto.com Arena-a inkhelah NBA champion lai Bucks tan Giannis chu a changtupa a ni. Greek tlangval hian minute 35 a khelh chhungin point 44 a nei a, rebound vawi 14 a la bawk. Khris Middleton (21 points) leh Bobby Portis ten an thlawp ṭha hle bawk.

Lakers player zingah mi paruk ngawtin point 10 chuang an nei, mahse che ṭha fal an awm bik lo. An khingpui hi champion lai Bucks an nih bawk avangin thawh chhuah an harsat, quarter hmasa pathumah an hniam vek avangin a hnuhnung berah sang zawk ni ve mah se awmzia a nei phak lo.

NBA regular season kal laiah Lakers hi an che fuh rei thei lo, match 29 zet an tlawmna a ni ta; vawi 26 chauh an la chak avangin Western Conference table-ah pakuana an ni, tun dinhmunah chuan playoff an khel phak lo tihna a ni.

NBA - Nimin Results
Phoenix Suns 114 - 109 Philadelphia 76ers
Indiana Pacers 112 - 133 Atalanta Hawks
Boston Celtics 126 - 91 Brooklyn Nets
Los Angeles Clippers 109 - 135 Memphis Grizzlies
Houston Rockets 97 - 110 New Orleans Pelicans
Detroit Pistons 86 - 116 Dallas Mavericks
New York Knicks 115 - 132 Denver Nuggets
Milwaukee Bucks 131 - 116 Los Angeles Lakers
Orlando Magic 113 - 95 Portland Trail Blazers
Minnesota 134 - 114 Sacramento Kings