Real & Barca pet chhuaktu Bilbao hmaah Valencia
Copa del Rey semifinal first leg-ah naktuk zing dar 2:00 hian Athletic Bilbao chuan Valencia an mikhual dawn a, club intiat tawk tak inhmachhawn tur an nih dawn avangin an inkhel a hmuhnawm loh ring suh.
Marcelino enkawlna hnuaia khel Bilbao hian 2019-20 leh 2020-21 season-ah a zawnin Copa del Rey final an lut a, mahse, an chak zo lo ve ve - a zawna a vawi thum nan final luh leh ngei an duh dawn a, an tan tun hi champion-na hun ṭha tia sawi ngam a ni bawk.
Bilbao hian 2019-20 final-ah Real Sociedad an ngam lo a, 2020-21 final-ah Barcelona lakah an tlawm bawk. Tun season-ah erawh round of 16 aṭanga Barcelona an petchhuah hnuin quarterfinal-ah Real Madrid an hneh leh a, an inrintawk vanglai tak a ni.
Chu chauh a ni lo - Bilbao hi inelna hrang hranga an match hnuhnung pakuaah vawi sarih an chak a, vawi khat chiah tlawmin vawi khat draw result an nei. An hneh zingah hian Barca leh Real bakah Atletico Madrid pawh an tel.
Bilbao hian tlarhmaa khel turin Iñaki Williams leh Iker Muniain te an nei tih hriat tel sak a ṭha a, European club liante chil tiputtu player pahnih hian Valencia an hlau lo tawp ang.
Valencia-in semifinal an luhna kalkawngah club lian hmachhawn an nei lo a, La Liga club an hmachhawn awmchhun chu quarterfinal-a 2-1 a an hneh tak Cádiz kha an ni - inelna hrang hranga an match hnuhnung pakuaah vawi li chiah an chak a, vawi thum an tlawm a, vawi hnih draw an nei.
Chutihrual chuan he team hian danglamna thlen thei player, tun season-a match 23-a khelha goal sarih leh assist pali neitu Hugo Duro, match 20-a goal riat leh assist pahnih nei thei midfielder Carlos Soler, match 26-a goal kua leh assist panga neitu Gonçalo Guedes te ho an nei tih hriat a ṭha a, Bilbao tan fimkhur a finthlak ang.
Copa del Rey Semifinal
First Leg
February 9, Nilaini Zan
(Result kan hre hman lo)
Rayo Vallecano 1:30 AM Real Betis
February 10, Ningani Zan
Athletic Bilbao 2:00 AM Valencia
Second Leg
March 2, Nilaini Zan
Valencia 1:30 AM Athletic Bilbao
March 3, Ningani Zan
Real Betis 1:30 AM Rayo Vallecano
*Away goal rule hman a ni lo