Chelsea-in Asian champion an hneh hram

FIFA Club World Cup-ah Chelsea-in Nilaini zan khan semifinal-ah Al Hilal an hmachhawn a, Romelu Lukaku goal hmangin 1-0 in an chak hram. February 12, Inrinni zanah final khelh a ni dawn a, London club hian South American champion Palmeiras an hmachhawn ang. Nomawi inchuhna tur hi semifinal an khelhna Mohammed Bin Zayed Stadium, Abu Dhabi-ah tho a ni.

Roman Abramovich-a'n Chelsea a lei hnuah Premier League, FA Cup, League Cup, Champions League leh Europa League bakah Community Shield leh UEFA Super Cup thlengin nomawi an chawi tawh. Amaherawhchu FIFA Club World Cup hian Blues nomawi dahna a la mawi lo a, Thomas Tuchel-a hoten lungthu an kim theih nan champion ngei a pawimawh hle.

Pu ber tel loin
Chelsea manager Thomas Tuchel-a'n Covid-19 a kai avangin team a ho thei lo a, assistant coach Zsolt Low hoin inelna an hmachhawn. AFCON-a Senegal champion puitu Edouard Mendy-a'n team zawm tawh mah se hahdamna hun an pek avangin Kepa Arrizabalaga-a'n bul a ṭan.

Tlarhnungah Thiago Silva, Antonio Rudiger leh Andreas Christensen te an intlar a, mual sirah Marcos Alonso leh César Azpilicueta te an awm bawk. Midfield-ah Mateo Kovacic leh Jorginho te an inkawp a, tlarhmaa mal tlat Romelu Lukaku thlawp turin Kai Havertz leh Hakim Ziyech te an awm.

Al Hilal-in Al Jazira 6-1 a an hneh ṭum aṭangin player pakhat chiah an thlak a, right back Saud Abdulhamid aiah Mohammed Al-Breik a rawn lut. Saudi club hian player 10 chhawr nawn mah se an khelh dan erawh thlak hretin Colombian midfielder Gustavo Cuéllar-a'n tlarhnung a pui deuh chawt.

A hunah Lukaku
Chelsea an chungnung nghal a, Ziyech-a'n box pawn aṭangin goal kham chung chiahah kawh zetin a pet. Belgian striker Lukaku a hnawksak a, amaherawhchu a hun ṭha hmasa pathum goal-ah a chantir thei lo. Minute 32-naah Chelsea an vannei a, Kai Havertz-a cross chuan Yasser Al-Shahrani perin, hemi per hi Lukaku-a'n chiang takin a khung.

Havertz-a'n cross thei turin a theihna a lantir a, Lukaku awmna a fuh bawk. Belgian striker hi kumin kumtir lamah manager Tuchel nen inhmu thiam lo mah se tunah chuan an inrem tawh a, match ruk chhung goal a khung loh hnuin goal pawimawh bik a khung. Chutihrualin goal luh danah Chelsea an vannei a, Saudi club an vanduai. First half-ah Kepa-a'n hna a nei lo a, chutihrualin Al Hilal winger Salem Al-Dawsari-a'n box pawn chiah aṭangin crossbar chungah a pet.

Second half-ah Chelsea an chungnung chhunzawm a, Germany international Havertz-a'n goal ban a pet per bakah Ziyech-a volley mawi zet chu keeper Abdullah Al-Mayouf-a'n ṭha takin a dang. London club-in team ṭha zawk an nih lantir mah se goal an khung belh loh avangin Al Hilal-in beiseina an nei ve reng.

Fak phu Kepa
Asian champion-in siphurh sutna remchang an nei a, mamawh a nih hunah chiah Kepa-a'n a hna a tlin hle. Spanish keeper hian FC Porto forward hlui Moussa Marega goal khung tur a dansak a, Mohamed Kanno ball pet ṭha takin a dang bawk.

Chelsea-in AFCON best keeper Mendy chu champion lawmna hun pawh pe loin UAE-ah an hruai a, semifinal-ah a thachhang dawltu Kepa a che ṭha. Blues coaching staff-ten final-ah thutlukna harsa siam tur an nei a, Kepa emaw Mendy emaw bench-ah an ṭhuttir a ṭul dawn.

Tuchel a ṭangkai
Chelsea assistant manager Zsolt Low chuan, "Halftime-ah Tuchel kan bia a, kan thlirna pawh a inang chiah. Kan zam deuh a, ho lam taka ball hloh a tam. Chawlhlawk laiin kan sawi ho a, player-te inrintawkna neih tir kan tum a, Tuchel thurawnin team a pui hle," tiin manager Thomas Tuchel-a'n video hmanga a team-te a rawn fuih thu a sawi.

Low chuan sawi chhunzawmin, "Tute pawhin Thomas hi rawn zin thei se kan ti a, sorkar dan kan zawm avangin a inkhung hrang. Ni tinin PCR test a nei a, a negative a nih chuan a rawn zin thei ang," tiin final-ah German manager an la beisei thu a sawi.

Chelsea player tan vaccine lak a ngai
Chelsea-in Champions League nomawi humhim turin last 16-ah Lille an hmachhawn dawn. February 22, Thawhlehni zan hian Stamford Bridge-ah first leg an khel ang a, March 16, Nilaini zanah Stade Pierre-Mauroy-ah French champion an hmachhawn dawn.

France-in an ramah Covid-19 vaccine la lo luh an phal lo a, Chelsea-in an player-te an chhawr vek theih dan chu neutral ground-a khelh a ni. Amaherawhchu UEFA dan tharah a theih tak loh avangin France rama Lille hmachhawn turin vaccine lak a ngai.

London club hian vaccine la lo player engzat nge an neih leh tute nge an nih puangzar lo mah se la lo an awm ngeia hriat a ni. German manager Thomas Tuchel pawhin, "Engtik hunah emaw chuan vaccine la lo chuan a la tuar ang. France ramah vaccine la lo player zin an phal lo a nih chuan player pawimawh kan chhawr thei dawn lo tihna a ni a, harsatna kan nei ang," tiin a lo sawi tawh.

Tun thlatir khan Premeir League chuan thuchhuah siamin player 80% chuan Covid-19 full dose an la tawh tih an puang.

FIFA Club World Cup
Thlirna Tawi

First Round - February 3, Ningani
Al Jazira 4–1 AS Pirae
ALJ : Zayed Al-Ameri 5'; Ahmed Al-Attas 25'; Milos Kosanović 41'; Abdoulay Diaby 63'
ASP : M'hammed Rabii Rabii 48' (OG)

Second Round
February 5, Inrinni
Al Ahly 1 - 0 Monterrey
ALA : Mohamed Hany 53'

February 5, Pathianni
Al Hilal 6 - 1 Al Jazira
AlH : Odion Ighalo 36'; Matheus Pereira 40'; Mohamed Kanno 57'; Salem Al-Dawsari 77'; Moussa Marega 88'; Andre Carrillo 90+2' (pen.)
AlJ : Abdoulay Diaby 14'

Semifinal
February 8, Thawhlehni
Palmeiras 2 - 0 Al Ahly
PAL : Raphael Veiga 39'; Dudu 49'
February 9, Nilaini
Al Hilal 0 - 1 Chelsea
CHE : Romelu Lukaku 32'

February 12, Inrinni
Third Place
Al Ahly 6:30 PM Al Hilal

Final
Palmeiras 10:00 PM Chelsea