The Little Magician a la thiam reng e

Philippe Coutinho-a'n a thiam a la theihnghilh lo - Nilaini zan khan Premier League-ah goal khat khungin assist vawi hnih a nei a, Aston Villa leh Leeds United te 3-3 in an inhnehtawk.

Tun season Premier League inkhel hmuhnawmah team pahnih an inhlau lo tawn a, attacking football hmuhnawm min hmuhtirin an innawr tawn zak zak - goal khung hmasa zawk chu Leeds an ni.

Mikhual team tan hian khel ṭha em em mai Daniel James chuan minute kuana lekah goal hmahruai a khung a, mahse, Villa-in an dawh rei lo.

Coutinho-a'n player ṭha bik a la ni reng tih pholangin minute 30-naah goal kil sirah mawi zetin a khung a, 1-1 a ni. Brazilian midfielder hian a la duhtawk mai lo - Jacob Ramsey goal khung tur pahnih chu a siamsak a ni a, Ramsey tan khung loha mawi lo khawpa ball duhthusam an ni.

Ramsey-a'n a goal hnihna a khung hian minute 43-na a ni a, Villa hi awlsam takin an chak dawn niin a lang hman. Mahse, James-a'n ngaihdan dang a nei a, 5 ft 7 in vel leka sang forward hi Villa defender palian karah zuang sang berin an goal hnihna a khung.

James hian goal khung theihna remchang dang vawi hnih a nei a, Villa keeper Emiliano Martinez-a'n vawi khat ṭha taka a dansak bakah crossbar-in a hmingṭha lehzual tur a thai bo sak bawk.

Leeds-in kut ruaka haw an tum lo. Minute 63-naah corner aṭanga ball kal chu Tyrone Mings-a'n a clear ṭha tawk lo a, Diego Llorente ke bulah tak ball a tla - Spanish centre back hian hnai set sawt aṭangin a chhuih lut a, 3-3 in inkhel a tawp.

A tawp lamah Villa an talbuai zawk - Emiliano Buendia chu hliam vangin lakchhuah a ngai a, Coutinho-a'n minute 90 a la tlin lo a, centre back Ezri Konsa chu minute 87-naah a yellow card pahnihna avangin hnawhchhuah a ni bawk.

A tawpa sawi hlawh ber erawh Coutinho a ni a, Brazilian midfielder hian Villa a pan hnuah league match thum khelin goal hnih a khung a, assist vawi hnih a nei bawk - a ṭhat dan berin kan hmu leh ta.

Villa boss Steven Gerrard chuan, "A buai nuai a ni, tiin sawi ila, kha inkhel kha kan sawifiah ber ang," a ti a, Gerrard chuan sawi zawmin, "Chawlhlawkah kha chuan kei pawhin thawk lak ka mamawh hial a ni.

"Premier League fak nan chuan a ṭha viau a, mahse, tlarhnungah insiamṭhat a, ho taka goal chhuah kan sim a hun. Lawmna tur erawh tam tak a awm a, kan goal khung pawh a ṭha hlawm hle.

"Chawlhlawk hman dawn chiahah uiawm takin goal kan chhuah a, mahse, Leeds khan an phu a ni. Coach tan chuan inkhel en nuam tak a ni lo a, fans erawh an mit a tlai khawp ang," a ti.

Leeds boss Marcelo Bielsa chuan, "Chak tum ve vea inkhel kan ni a, chak phu zawk sawi tur awm lo khawpin kan inbuk tawk. Bul kan ṭan ṭha a, mahse, engtiklai khan nge kan buai thut ka hre lo.

"A harsa a, mahse, chawlhlawk hmaa kan goal khung khan min pui a ni. Second half-ah zawi muangin hma kan sawn a, draw hi result fair tak a ni," a ti a, chak phu zawk an awm loh thu a sawi.

Villa hi table-ah 11-na an nih chhunzawm a, Leeds United hi 15-naah an awm mek - relegation zone aṭangin point ruk chiahin an him.