Spurs-in Spurs zia an chhuah!

Pathianni khan Tottenham Hotspur-in FA Cup fourth round aṭangin Brighton & Hove Albion chu 3-1 in an pet chhuak a, Harry Kane, Ben Davies leh player thar Dejan Kulusevski ten coach Antonio Conte hnuaia an thawhrim rah an seng thu an sawi.

Mahse, Spurs player-ten an coach an fakna chil per pawh a hul hmain Southampton lakah 3-2 in an tlawm a, minute 70 thlenga 2-1 a hmahruaitu Spurs tan result ṭha a ni lo - table-ah pasarihna an ni a, season thara Champions League an khelh dawn leh dawn loh a chiang lo zel.

Mualneitu Spurs tan Southampton defender Jan Bednarek chuan minute 18-na lekah hna a thawhsak a, Pierre-Emile Hojbjerg-a'n Son Heung-min tana a siamsak chu Bednarek hian lo dan a tumna lamah an lamah a tlawh lut.

Spurs-in goal khung hmasa mah se Saints-in inkhel an thunun zawk a, goal an chhuah aṭanga minute ngana lekah Armando Broja chuan an phu ang ngeiin si phurh a sut.

Mahse, London club an hnual duh lo - chawlhlawk hman hnua hmasawn Spurs tan Son chuan minute 70-naah a khung ve leh a, 2-1 a ni. Conte leh a naute an chak leh mai tura ngaihna a lian hman.

Southampton-in ngaihdan dang an nei thung - minute 80 hnuah Mohamed Elyounoussi leh Che Adams ten goal khat ve ve an rawn khung a, mikhual team zawkin 3-2 in hnehna an chang daih.

Spurs tan Steven Bergwijn chuan draw-na goal a khungah inngai mah se offside vangin pawmsak a ni lo a, London club hi league match hnih chu a zawnin an tlawm ta.

Saints manager Ralph Hasenhuttl chuan, "Southampton ka pan hnua kan khelh ṭhat ber ṭum a ni," tiin a naute a fak a, coach a nih hnua a match 500-naah point thum an hmu thei chu a lawm hle.

Tottenham manager Conte chuan, "Match tinah point thum hmuh kan harsat em em a, inenfiah kan mamawh - ka sawi nawn leh duh a, hei hi kan nihphung chu a ni ta ber a nih hi.

"Inkhelh apiangin point thum hlawh chhuak thei kan ni tih kan hriat a ṭul a, chutihrual chuan chak lo emaw draw thei pawh kan nih avangin a harsa dawn tih kan hriat tel a ṭul.

"He team hian insiamṭhat hna kan thawk mek a, rang taka engkim thlak theih a ni lo. He hmun ka lo thlen hnuah ringawt pawh hei hi chu ka sawi ngun tawh a, mipui hriat châk zawng a ni lo a ni mahna," a ti a, hnathawh tur an la ngah thu a sawi.