Indian Wells khel tur zingah Djokovic

Australian Open khel thei loa an thawn haw tak Novak Djokovic chu inkhel loin a la awm rih. March thla a khelh tur Indian Wells-ah erawh Djokovic hi a inlan thei dawn niin a lang, player inkhel tur zingah ziah luh a ni.

Kum 34 mi Djokovic hian tun thlengin Covid-19 laka invenna a la la lo. United States-ah pawh hrileng inkaihhruaina a inang lo fur a, state thuneitu kuta dah a ni hlawm. Tournament khelhna tur California hian tennis player chungchangah sawi an la nei rih lo.

Tournament buatsaihtu lam chuan thuchhuah siamin, "ATP leh WTA inkaihhruaina kan zawm dawn, chutih rualin state sorkar thu ngaihchan a ngai bawk, a bik takin khualzin chungchangah sorkar thu a pawimawh ang," an ti.

Djokovic bakah hian Australian Open champion Rafael Nadal, world number 2 Daniil Medvedev, Alexander Zverev leh Stefanos Tsitsipas te hming pawh tarlan tel a ni bawk.