Ajax manager hmalam a chiang lo

Marc Overmars-a'n Ajax director of football hna a chelh chu a thawhpui hmeichhe laka a chet mawi loh avangin a bansan a, hemi a nih avang hian club manager Erik ten Hag hmalam hun a chiang lo.

Kum 52 mi Erik ten Hag chuan, "Marc Overmars nen hian inlaichinna ṭha tak kan nei. Tuna thu thar hi ka chanchin a ni lo a, chuvangin ka hmalam hun ngaihtuah a ṭul lo. Chutihrualin thil thleng nghawng erawh ka la zirchiang ang," tiin a sawi.

Dutch manager Ten Hag chuan sawi chhunzawmin, "Thil thleng hi mak ka ti a, pawi ka ti takzet. A bik takin a tuartu hmeichhia te ka khawngaih a, a hrehawm tawrhna ka tawrhpui takzet a ni," tiin a ṭhianpa Overmars chet dan chu pawi a tih thu a sawi.

Overmars hian kum 2012 aṭang khan Ajax director of football hna hi a chelh a, tun hnai mai khan June 2026 thleng contract a pawtsei. Barcelona leh Arsenal player hlui Overmars hian mawi lo takin a thawhpui hmeichhiate a lo be ṭhin a ni.